02.07.2026 | 17:15
Ղրղզստանը հարևան երկրներից վառելիք է խնդրում․ երկիրը բենզինի 90%-ը ստանում է Ռուսաստանից
Ի՞նչ սկզբունքով կկրճատվեն մարզպետարանների ոչ պրոֆեսիոնալ աշխատակիցները. Սուրեն Պապիկյան. ՏԵՍԱՆՅՈՒԹ
Հասարակություն
28.03.2019 | 20:02
Մարզպետարանների օպտիմալացման նախագիծն արդեն պատրաստ է։ Գործընթացի վերջնարդյունքում ամեն մարզպետարանից կկրճատվի 30-ից 40 աշխատակից։ Factor.am-ի հետ զրույցում Տարածքային կառավարման և զարգացման նախարար Սուրեն Պապիկյանը տեղեկացրեց, որ օպտիմալացման նախագիծը բխում է Տարածքային կառավարման մասին օրենքից, որն այս պահին Կառավարությունում է, քննարկումից հետո այն կուղարկվի Ազգային ժողով։ Դրա ընդունումից հետո օպտիմալացման նախագիծը կսկսվի իրագործվել։
Ըստ նախարարի՝ այս ամենի նպատակը արդյունավետ կառավարում ունենալն է․ «Մեզ համար կարևոր է, որ մարզպետարաններում աշխատեն պրոֆեսիոնալներ։ Մենք շեշտը դնում ենք արդյունավետ կառավարման և պրոֆեսիոնալիզմի վրա»։
Նախարարին հիշեցրինք, որ օպտիմալացման մասին խոսակցությունների սկզբնական փուլում կառավարությունը խոստանում էր կրճատվող աշխատակիցներին վերապատրաստել, որպեսզի նոր հմտություններով կարողանան տեղ գտնել աշխատաշուկայում։ Նախարար Պապիկյանից հետաքրքրվեցինք՝ կա՞ այդպիսի ծրագիր և կոնկրետ ի՞նչ միջոցառումներ են արվելու:
«Կառավարությունը տեսլական ունի ստեղծել հնարավորություն։ Իհարկե, տարիքային տարբեր խմբեր կան, մենք չենք կարող բոլորին մեկ ֆորմայի մեջ դնել։ Այսինքն՝ կան երիտասարդներ, որոնց մասնագիտական հնարավորությունները թույլ են տալիս հմտանալ Տեղեկատվական տեխնոլոգիաների ոլորտում, և կան մարդիկ, որոնք այլ ոլորտում հմտանալու ցանկություն չունեն, նրանք կարող են զբաղվել բիզնեսով։ Կառավարությունը հիմա բավականին հարմար և տնտեսության մեջ կարևոր դերակատարում ունեցող ուղղությունների մասով վարկեր է տրամադրում։ Մեր նույն գործընկերները կարող են նաև զբաղվել բիզնեսով»,- ասաց Սուրեն Պապիկյանը։
Դիտարկմանը, որ կադրեր ընտրելիս մարզպետները հնարավոր է՝ սուբյեկտիվ գտնվեն և տուրք տան «խնամի-ծանոթ-բարեկամ» սկզբունքին, դա բացառելու համար ի՞նչ մեխանիզմ է գործելու, նախարարը տեղեկացրեց, որ կգործի հանձնաժողով, որը ատեստացիայի արդյունքում կորոշի, թե որ մասնագետներն են պատրաստ: «Մարզպետներն արդեն 9 ամիս աշխատում են այդ մարդկանց հետ և գիտեն՝ ով ոնց է աշխատում»,- նշեց Տարածքային կառավարման և զարգացման նախարար Սուրեն Պապիկյանը։
Մանրամասները՝ տեսանյութում:
Ռոբերտ Անանյան
