«Փաշինյանի հստակ դիրքորոշումն ավելի հետ է մղում պատերազմի հավանականությունը». Ստեփան Գրիգորյան. ՏԵՍԱՆՅՈՒԹ

Գլոբալիզացիայի և տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանը Factor.am-ի հետ զրույցում կարծիք հայտնեց, որ Մինսկի խմբի վերջին հայտարարությունը ապացուցեց՝ Նիկոլ Փաշինյանը հետևողական է ու շարունակում է պնդել  իր դիորքրոշումն Արցախը բանակցային կողմ դարձնելու առիթով, ինչն ինքը ողջունում է:

«Ինչո՞ւ, որովհետև անիմաստ է վերականգնել բանակցային պրոցեսը Մինսկի խմբի շրջանակում, Մադրիդյան սկզբունքների շուրջ խոսել՝ առանց որակական փոփոխությունների»,- ասաց քաղաքագետը՝ շարունակելով. «Որակական, բովանդակալից փոփոխությունն այն կլինի, եթե Արցախը մասնակցի։ Այդ դեպքում հույս կունենանք, որ ինչ-որ բովանդակություն կներշնչվի այդ պրոցեսում, թե չէ նախկինին վերադառնալն ու ապրիլյանի նման մի հատ էլ պատերազմ ստանալն անիմաստ է»։

Քաղաքագետը հիշեցրեց, որ Բուդապեշտի գագաթնաժողովում ճանաչվել են կոնֆլիկտի 3 կողմերը, այդ թվում՝ Ղարաբաղի իշխանությունը. «Դա եղել է, ուղղակի մենք խոսում ենք վերականգման մասին»:

Ըստ Գրիգորյանի՝ Մինսկի խմբի հայտարարությունը պատահական չէր. «Իրենք ասում են՝ մենք կանք, ո՞ւր եք գնում, հայեր, քանի որ Նիկոլ Փաշինյանի քաղաքականությունն անսպասելի է և ուղիղ Ադրբեջանի հետ»։

Հարցին՝ արդյո՞ք հնարավոր է Արցախին վերադարձնել բանակցային սեղան, Ստեփան Գրիգորյանը պատասխանեց. «Ժամանակի հետ համանախագահող երկրները լրջությունը կհասկանան, որ Փաշինյանի լեգիտիմությունը բարձր է, անիմաստ է նրա դեմ դուրս գալ, ավելի լավ է համոզել Ադրբեջանին, որ համաձայնվի: Արցախահայությունն ունի դիրքորոշում, և մենք իրավունք չունենք չհարգել։ Այդպես է ձևակերպված այդ կոնֆլիկտի ֆորմատը»:

Դիտարկմանը, թե դիրքորոշման կոշտացումն արդյոք չի՞ հանգեցնի պատերազմի, քաղաքագետն արձագանքեց. «Պատերազմի վտանգը միշտ էլ կա։ Մեր հստակ դիրքորոշումն ավելի հետ է մղում պատերազմի հավանականությունը։ Երբ դու սկսում ես լողալ, ասել՝ այո, ոչ, ինչ-որ խաղեր տալ, դու իրենց ոգևորում ես։ Ինչո՞ւ եղավ ապրիլյան պատերազմը։ Նիկոլ Փաշինյանի հետևողականությունն է երաշխիքը, որ պատերազմ չի լինի»:

Արցախում Հայաստանի ու Արցախի Անվտանգության խորհուրդների համատեղ նիստի անցկացմանն Ադրբեջանի արձագանքը, որ եթե Հայաստանի վարչապետն իր երկրի Անվտանգության խորհրդի արտահերթ նիստն անցկացնում է Ստեփանակերտում, ապա այլևս անհրաժեշտություն չկա ջանքեր գործադրելու՝ Լեռնային Ղարաբաղի տարածաշրջանի հայերին բանակցային գործընթացում ներգրավելու համար և որ Հայաստանի վարչապետը, հնչեցնելով «Ղարաբաղի հայության» գաղափարը, վերջ է դրել բառախաղին՝ հայտարարելով, որ Լեռնային Ղարաբաղում բնակվող հայերը հանդիսանում են ոչ թե «ժողովուրդ», այլ հայկական համայք», ըստ Ստեփան Գրիգորյանի, «խղճուկ արձագանք է և թույլ է տալիս ասելու, որ մենք ճիշտ ճանապարհով ենք գնում»։

Հարցազրույցն ամբողջությամբ՝ տեսանյութում:

Մարինե Խառատյան