Հասարակություն
27.02.2019 | 18:55
Հայաստանը պարտավոր է Կարեն Ղազարյանին իր քաղաքացիության երկիր վերադարձնելու գործընթաց սկսել․ պետք է դիմենք Մինսկի խմբի համանախագահներին՝ Ադրբեջանում 20 տարվա ազատազրկման դատապարտված Կարեն Ղազարյանին Հայաստան վերադարձնելու հարցով։
Այս մասին Factor.am-ի հետ զրույցում, անդրադառնալով ՀՀ քաղաքացի Կարեն Ղազարյանին ադրբեջանական ծանր հանցագործությունների դատարանի կողմից 20 տարվա ազատազրկման դատապարտելու որոշմանը, ասաց «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը:
«Կարեն Ղազարյանի շուրջ ստեղծված այդ պատմությունը հնարած պատմություն է, նա չի ծառայել երբեք և չէր կարող ծառայել, որովհետև ունի հոգեկան առողջության հետ կապված խնդիրներ, ինչը ամրագրված է փաստաթղթով։ Կարեն Ղազարյանի հարցում ոտնահարված են միջազգային իրավունքի բոլոր նորմերը, որով Ադրբեջանն իրեն ուղղակիորեն հակադրեց միջազգային իրավունքին, ինչի մասին, ի դեպ, ասել է Ադրբեջանի ղեկավարը՝ նշելով, որ միջազգային իրավունքը կարող է խախտվել․ ով ուժեղ է նա էլ հաղթում է: Այնպես որ ստեղծված իրավիճակում Հայաստանը պարտավոր է անհապաղ դիմել Մինսկի խմբի համանախագահներին՝ միջնորդների միջոցով սկսել գործընթաց արդեն դատապարտյալ Կարեն Ղազարյանին նրա քաղաքացիության երկիր վերադարձնելու համար»,- ասաց Լարիսա Ալավերդյանը։
Նրա խոսքով՝ Կարեն Ղազարյանի դատավճռի մասին հայտարարելու օրը պատահական չի ընտրված, ինչը ևս մեկ անգամ փաստում է ադրբեջանական ցինիզմի մասին։
«Սա սումգայիթյան ջարդերի առաջին կատաղի օրն է։ Ծիսակատարության նման այս գործողությունները խոսում են Ադրբեջանի քաղաքական վերնախավի ցինիզմի մասին»,- իր խոսքը եզրափակեց Ալավերդյանը։
Հիշեցնենք, Կարեն Ղազարյանի՝ բանակում չծառայելու վերաբերյալ, ի պատասխան ադրբեջանական կողմի այն հայտարարության, որ նա գերի է վերցվել դիվերսիոն գործողությունների արդյունքում, 2018թ. հուլիսին ՀՀ պաշտպանության նախարարությունը հայտարարել էր, որ Տավուշի Բերդավան գյուղի բնակիչ 1984թ. ծնված Կարեն Ղազարյանը չի ծառայում և երբեք չի ծառայել ՀՀ ԶՈւ-ում։
ՀՀ պաշտպանության նախարար Դավիթ Տոնոյանը, հանդիսանալով Գերիների, պատանդների և անհայտ կորածների միջգերատեսչական հանձնաժողովի նախագահ, դիմել էր ԿԽՄԿ Երևանյան գրասենյակ ՀՀ քաղաքացի Կարեն Ղազարյանի վերադարձի կազմակերպման համար։ ԿԽՄԿ Երևանյան գրասենյակը զգուշացված էր Կարեն Ղազարյանի առողջական խնդիրների վերաբերյալ:
Աղավնի Սուքիասյան
