Քաղաքականություն
11.08.2017 | 10:21
Դեկտեմբերի 10-ին կկայանա պատգամավորների ընտրությունը, իսկ դեկտեմբերի 13-ին պատգամավորները պետք է ընտրեն պատրիարքին: Այս մասին հայտնում է Պոլսի «Ակօս» շաբաթաթերթը:
Նշվում է նաև, որ կարգադիր հանձնախմբի պատրաստած խնդրագիրը տեղապահ սրբազանի կողմից վավերացվելուց հետո հանձնվել է Պոլսի կուսակալությանը, որն իր հերթին այն պետք է փոխանցի Թուրքիայի ներքին գործերի նախարարությանը: Ընտրության վերջնական օրը կհստակեցվի նախարարության որոշումից հետո:
Հիշեցնենք, որ մարտի 15-ին Ստամբուլում տեղի էր ունեցել Պոլսո Հայոց պատրիարքի տեղապահի ընտրությունը, ուր հաղթանակ էր տարել Գարեգին Բեկչյանը։ Սակայն ընտրություններում պարտված Արամ արքեպիսկոպոս Աթեշյանը ընտրություններից անմիջապես հետո հայտարարել էր, որ չի հեռանա տեղապահի պաշտոնից, քանի որ Ստամբուլի նահանգապետարանից գրություն էր ստացվել, ուր նշված էր, որ իրավաբանորեն անհնար է համարվում պատրիարքական ընտրությունների գործընթացի մեկնարկը:
Նշենք, որ կոմայի մեջ է գտնվող Պոլսո պատրիարք Մեսրոպ Մութաֆյանի փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրվել էր ոչ թե հայ համայնքի, այլ պետության կողմից։
Նշենք նաև, որ Պոլսո Հայոց պատրիարքարանի եկեղեցական խորհուրդն Արամ արքեպիսկոպոս Աթեշյանին կարգալույծ էր արել:
