«Եթե ես ընկերներ կորցրած չլինեի, իմ դիրքորոշումն այլ կլիներ». Օսիպյան. ՏԵՍԱՆՅՈՒԹ

«Սասան ծռերի» տասը անդամի գործով դատական նիստին որպես տուժող դատարանում ցուցմունք տվող Վալերի Օսիպյանին ամբաստանյալներից Պավլիկ Մանուկյանը հարցրեց՝ ինչպին է եղել իրենց վերաբերմունքը նրանց նկատմամբ, վերաբերվե՞լ են որպես արժանապատիվ սպաների:

Օսիպյանը պատասխանեց. «Ուղղակի պիտի արտահայտվեմ, չեմ կարող չարտահայտվել. այն ինչ սպային վայել ձևով դուք կազմակերպեցիք, դա շոու էր ընդամենը, ես տեսա, հետևեցի, նկարահանում էին, ես պահանջեցի ՝ չնկարահանեն, ես մինչ այդ ձեզ խնդրեցի՝ թույլ տվեք իմ ընկերն ա, ես գնամ, մասնակցեմ հուղարկավորությանը, կվերադառնամ, դուք թույլ չտվեցիք: Վերաբերմունքը իմ հանդեպ վիրավորական չի եղել ձեր կողմից, վիրավորական եղել ա, բայց ոչ բոլոր տղաների կողմից»:

Պավլիկ Մանուկյանը հնչեցրեց հաջորդ հարցը. «Պարոն գնդապետ, մենք մտերմիկ զրուցել ենք, ձեր տեղեկություններով՝ Սաշիկը քցել էր ախպորդ, որ դուրս եկաք գնդից, քցածը վերադարձրե՞ց»:

Դատավորը հանեց այդ հարցը, քանի որ այն չէր առնչվում քրեական գործին: Նախագահող դատավոր Մեսրոպ Մակյանը հարց տվեց Օսիպյանին սպանված ոստիկան Յուրի Տեփանոսյանի հետ կապված, թե նրան որտեղի՞ց տեղեկություն, որ Տեփանոսյանին սպանել է ամբաստանյալ Սմբատ Բարսեղյանը, ոստիկանապետն արձագանքեց. «Ականատես չեմ եղել, լրատվամիջոցներից, իրավապահներից, ովքեր խոսում էին, այնուհետև գործի հանգամանքներից»:

Դատարանը նաև հետաքրքրվեց նրանից՝ թե արդյոք ինչ դիրքորոշում ունի «Սասնա ծռերի» նկատմամբ համաներում կիրառելուն: «Ես կորցրել եմ ընկերներ, եթե չլինեին կորցրած իմ գործընկերները, միգուցե իմ դիրքորոշումն այլ լիներ: Կարծում եմ՝ յուրաքանչյուրը օրենքով նախատեսված իր պատիժը պետք է կրի, դատաքննությունը պետք է շարունակվի»,- եզրափակեց նա:

Օսիպյանի պատասխանից հետո նիստին ներկա եղողները «ամոթ» վանկարկեցին, այդպիսով Օսիպյանի հարցաքննությունն ավարտվեց: Իսկ արդեն դատարանի բակում նրան կրկին «ամոթ» վանկարկելով ճանապարհեցին: Ոստիկանապետը նաև չցանկացավ պատասախանել լրագրողների հարցերին, միայն կրկնեց, որ օրենքով խստագույնս պատիժ պետք է կրեն:

Լիլիթ Շաբոյան