ԱԳ նախարարը մեղմացնում է հակամարտության երեք կողմի մասին Նիկոլ Փաշինյանի հայտարարությունը. ՏԵՍԱՆՅՈՒԹ

«Հայաստանը բանակցող կողմ է, Հայաստանը երաշխավորն է Ղարաբաղի անվտանգության»: Փետրվարի 4-ին Ազգային ժողովում լրագրողների հետ զրույցում այս մասին ասաց ՀՀ ԱԳ նախարար Զոհրաբ Մնացականյանը՝ պատասխանելով Factor.am-ի թղթակցի հարցին՝ արդյո՞ք ԼՂ հակամարտության կարգավորման բանակցություններում Հայաստանը բանակցող կողմ է, ինչի մասին ասել է վարչապետ Փաշինյանը:

ՀՀ վարչապետ Նիկոլ Փաշինյանը, հիշեցնենք, Բեռլինում Գերմանիայի կանցլերի հետ համատեղ ասուլիսում նշել էր ԼՂ հակամարտության բանակցություններում երեք կողմերի մասին:

«Հայաստանն ունի իր մասը, Հայաստանը երաշխավորն է Ղարաբաղի անվտանգության, Հայաստանը մասնակցում է բանակցություններին, Հայաստանը շարունակելու է այդ ամենն անել»,- ասաց Զոհրաբ Մնացականյանը:

Լրագրողները հետաքրքրվեցին նաև, թե ի՞նչ նկատի ուներ Մերկելը՝ խոսելով խիզախության մասին: «Այն, ինչ արվել է պարոն Փաշինյանի կողմից: Խիզախություն է խոսել խաղաղության մասին, և չի նշանակում, որ խոսելով խաղաղության մասին՝ ինչ-որ մեկը հարցականի տակ է դնում վճռականությունը: Բայց որ խոսել է խաղաղության մասին, որը վերաբերում է բոլոր մասնակիցներին՝ և՛ ադրբեջանական ժողովրդին, և՛ Ղարաբաղի ժողովրդին, և՛ Հայաստանի ժողովրդին, դրա մասին է խոսքը: Դա է խիզախությունը, որ մենք շատ կողջունենք, որպեսզի նման հայտարարություն գա նաև մյուս կողմից»,- պարզաբանեց ԱԳ նախարարը:

Նշենք, որ Զոհրաբ Մնացականյանն Ազգային ժողով էր գնացել «Լուսավոր Հայաստան» կուսակցության հրավերով՝ ԼՀԿ խմբակցության հետ հանդիպելու: Դռնփակ հանդիպումից հետո ԱԳ նախարարը լրագրողներին ասաց, որ շատ է կարևորում հանդիպման նման ձևաչափը:

«Սա ինձ համար շատ էական է՝ որպես կառավարության անդամ աշխատել նոր Ազգային ժողովի խմբակցությունների հետ, չափազանց կարևոր գործառույթ է: Սա երկխոսություն է, որտեղ մենք համեմատում ենք մոտեցումները, համեմատում ենք գնահատականները, փորձում ենք ինքներս մեզ համար տեսնել, թե որտեղ ինչն է ճիշտ, որտեղ ինչին պետք է ուշադրություն դարձնենք, նաև բացատրում ենք մեր արածը: Այդ առումով է, որ նման ֆորմատով հանդիպումները բարձր եմ գնահատում»,- հավելեց նա:

Մանրամասները՝ տեսանյութում