16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Ադրբեջանի հետ պատերազմի դեպքում ՀԱՊԿ-ը չի աջակցի․ վստահ է հայաստանցիների 59,44 տոկոսը. ՏԵՍԱՆՅՈՒԹ
Քաղաքականություն
01.02.2019 | 20:15
Ադրբեջանի դեմ հնարավոր պատերազմի դեպքում Հավաքական անվտանգության պայմանագրի կազմակերպությունը (ՀԱՊԿ) չի աջակցի Հայաստանին, կարծում է հայաստանցիների 59.44%-ը: Այս և սոցհարցման այլ տվյալներ այսօր հրապարակել է Գլոբալիզացիայի և տարածաշրջանային համագործակցության վերլուծական կենտրոնը:
Կենտրոնի ղեկավար, քաղաքագետ Ստեփան Գրիգորյանի ներկայացմամբ՝ Ռուսաստանի ղեկավարած ՀԱՊԿ-ի նկատմամբ այդպիսի անվստահությունը փաստական հիմքեր ունի. «Մենք տեսնում ենք անվստահություն մեր հասարակության մեջ ՀԱՊԿ-ի նկատմամբ, ես կարծում եմ՝ ոչ ոք չի կասկածում, որ ՀԱՊԿ-ն մեզ չի աջակցի, եթե, Աստված մի արասցե, պատերազմ սկսվի: Մենք կյանքում էլ տեսնում ենք, որ ՀԱՊԿ-ում մենք չունենք հենարան: ՀԱՊԿ-ում որոշումները մեր դեմ են արվում, դա է պատճառը, որ հասարակության մեջ բացասական տրամադրությունները՝ կապված ՀԱՊԿ-ի հետ, շատ բարձր են»:
Հարցումն անցկացվել է 796 քաղաքացիների շրջանում՝ 2018 թվականի օգոստոս-սեպտեմբերին: Հարցված քաղաքացիների 51.47 %-ի կարծիքով՝ Ռուսաստանը բացասական ազդեցություն է ունենում Լեռնային Ղարաբաղի հակամարտության կարգավորման վրա: Ըստ Ստեփան Գրիգորյանի՝ այսպիսի գնահատականը պայմանավորված է հենց Ռուսաստանի քաղաքականությամբ:
«Ռուսաստանը վերջին տարիներին զենք է վաճառում Ադրբեջանին՝ հարձակողական, լուրջ զենք, և պարզ է, որ մեր հասարակության ներսում Ռուսաստանի նկատմամբ վերապահումներ կան: Եթե Ռուսաստանն անընդհատ օգտագործում է Ղարաբաղի հարցը, որ մեզ կախվածության մեջ պահի, դա դուր չի գալիս հայ ժողովրդին»,- ասում է քաղաքագետը:
Ըստ վերլուծական կենտրոնի հարցման տվյալների՝ հայաստանցիների 19.10%-ը ՌԴ-ին չի դիտարկում իբրև Հայաստանի դաշնակից պետություն: Ռուսաստանին դաշնակից համարողները կազմել են հարցվածների 41.21%-ը: Այդուհանդերձ, ըստ քաղաքագետի, այս տվյալը կրկին ցածր վստահության մասին է վկայում:
«Նորից շատ ցածր է: Ի՞նչ է նշանակում՝ մենք Ռուսաստանի հետ դաշնակից ենք, ՀԱՊԿ-ի անդամ ենք, բայց միայն 40%-ն է Ռուսաստանին համարում դաշնակից։ Եթե Ռուսաստանը գազը մեզ վրա ծախում է 2 անգամ ավելի թանկ, քան Ուկրաինային, պարզ է, որ դա մեր հասարակությանը չի կարող դուրս գալ, և ես այդ թվերը դրանով եմ բացատրում»,- նշում է պարոն Գրիգորյանը:
Հայաստանցիների շրջանում ամենաբարձր հեղինակություն վայելող միջազգային կառույցը Եվրոպական միությունն է: Հարցվածների 86.85%-ը կարծում է, որ Հայաստանի նոր իշխանությունները պետք է խորացնեն հարաբերությունները Եվրոպական միության հետ։ Քաղաքացիների 66.71%-ը Հայաստանի ապագան կապում է Եվրոպական միությանն անդամակցության հետ: Իսկ ահա մարդկանց 69.89%-ը դրական է վերաբերվում Հայաստանի՝ ՆԱՏՕ-ին հնարավոր անդամակցությանը:
«Մարդիկ հասկանում են, որ արժեքային համակարգը, սկզբունքները շատ կարևոր են։ Մեծ գաղտնիք չէ, որ Եվրամիության անդամ երկրները զենք չեն ծախում այն երկրներին, որտեղ կոնֆլիկտ կա: Բարձր տոկոս է կազմում մարդկանց թիվը, որոնք մեր ապագան, նաև՝ համագործակցությունը կապում են Եվրամիության հետ, և բավական կրիտիկական են Ռուսաստանի նկատմամբ: Սա է իսկական պատկերը»,- մեկնաբանում է Ստեփան Գրիգորյանը։
Նրա գնահատմամբ՝ հարցման այսպիսի տվյալները գալիս են կոտրելու Հայաստանի շուրջ ձևավորված կարծրատիպը, թե հայաստանցիները ռուսամետ են և մերժում են արևմտյան արժեքները:
Մանրամասները՝ տեսանյութում
Ռոբերտ Անանյան
