20.05.2026 | 21:00
Ռուսական ռեգիստրում Նարեկ Կարապետյանի անունը․ ինչ են ցույց տալիս փաստաթղթերն ու բիզնես կապերը
Ադրբեջանում Մարդու իրավունքների ոլորտը կայուն չէ, Հայաստանում լուրջ առաջընթաց կա. Amnesty International
Քաղաքականություն
11.01.2019 | 12:21
Ադրբեջանի կառավարությունն իր գործողություններով ցանկանում է միանշանակ ցույց տալ բոլորին, որ չի հանդուրժելու որևէ քննադատություն իր հասցեին, այսօր առավոտյան Վաշինգտոնում տեղի ունեցած մամուլի ասուլիսի ընթացքում հայտարարել է Amnesty International իրավապաշտպան միջազգային կազմակերպության Եվրոպայի և Կենտրոնական Ասիայի տնօրեն Դանիել Բալսոնը. տեղեկացնում է amerikayidzayn.com-ը:
«Կասկած չկա, որ Ադրբեջանում մարդու իրավունքների ոլորտի վիճակը սարսափելի է. հիմնարար ազատություններն ու մարդու իրավունքներն անընդհատ խախտվում են Ադրբեջանի կառավարության կողմից ինչպես երկրի ներսում, այնպես էլ՝ սահմաններից դուրս»,- նշել է Բալսոնը։
Վաշինգտոնի ազգային մամուլի ակումբում կայացած ասուլիսը նվիրված է եղել Ադրբեջանում ձերբակալված լրագրող և բլոգեր Մեհման Հուսեյնովին, որը արդեն 15 օր է հացադուլ է հայտարարել: Հուսեյնովին ձերբակալել էին երկու տարի առաջ՝ 2017-ի հունվարին, այն բանից հետո, երբ երիտասարդ լրագրողը համացանցում հրապարակել էր Ադրբեջանի մի շարք բարձրաստիճան պետական պաշտոնյաների շքեղ տների լուսանկարները:
Լրագրողի եղբայրը՝ իրավապաշտպան Էմին Հուսեյնովը, միջոցառման ընթացքում կոչ է արել միջազգային կառույցներին ավելի ակտիվ լինել Ադրբեջանի քաղաքացիական հասարակության զարգացման աջակցության գործում: Ըստ նրա՝ երկրի իշխանությունները չեն հարգում սեփական օրենքներն ու կառույցն օգտագործում ոչ թե արդարադատություն իրականացնելու, այլ սեփական թշնամիներին պատժելու նպատակով։
Նույն կարծիքն է արտահայտել նաև Amnesty International-ի ներկայացուցիչը։
«Ամերիկայի Ձայնի» հետ զրույցում, Դանիել Բալսոնը խոսել է նաև Հայաստանում մարդու իրավունքների ոլորտի մասին՝ ընդգծելով, որ երկրում տեղի ունեցած թավշյա հեղափոխության արդյունքում իշխանության խաղաղ փոխանցումը տպավորիչ էր:
«Մենք սա դիտարկում ենք որպես երկրի քաղաքացիական հասարակության լուրջ առաջընթաց։ Այդուհանդերձ, դեռ մի շարք խնդիրներ կան, որոնք մտահոգում են իրավապաշտպաններին»,- նշել է Բալսոնը:
Այդ խնդիրների թվում քաղաքացիների նկատմամբ նախաքննական ձերբակալությունների կիրառումն է, երբ մարդկանց մինչ դատն ազատազրկելու ավանդույթը մնում է: Մեկ այլ խնդիր է նաև սեռական փոքրամասնությունների իրավունքների անբավարար ապահովումը։
«Սեռական փոքրամասնությունների իրավունքները մեծ խնդիր են ամբողջ տարածաշրջանի համար: Նրանց հաճախ զրպարտում և մեկուսացնում են՝ զրկելով սեփական իրավունքներն իրականացնելու հնարավորությունից»,- ընդգծել է Amnesty International-ի տնօրենը:
