Շամիրամի արյունալի միջադեպի պատճառը տարիների պար՞տքն է. նոր մանրամասներ

Շամիրամ գյուղում կատարված հանցագործության մեջ կասկածվող և ոստիկանության կողմից որոնվող Թելման Քալաշյանն Արմավիրի մարզի Մյասնիկյան համայնքից է, համայնքի ղեկավար Տիգրան Բաղդասարյանը Factor.am-ի հետ զրույցում պատմեց՝ Քալաշյանների ընտանիքի հիմնական զբաղմունքն անասնապահությունն է:

«Ոչխարի մեծ հոտ ունեն, հիմնականում գյուղում են ապրում, իրենց տունը, ամեն ինչը գյուղում է, բայց տարվա կեսից ավելին ընտանիքի անդամների հետ անցկացնում էր սարերում»,- մեզ հետ զրույցում մանրամասներ ներկայացրեց Մյասնիկյան համայնքի ղեկավարը:

Նրա փոխանցմամբ՝ ընտանիքը ապրում է սոցիալական նորմալ պայմաններում, այժմ էլ գտնվում են սարերում՝ Ալագյազի փեշերին, այնտեղ կմնան մինչև խոր աշուն:

«Ոստիկանները երեկվանից գյուղում են, հսկում են իր, իր հարազատների տները, որ հանկարծ չգան, վնաս չտան»,- նկատեց Բաղդասարյանը:

 Միջադեպի հետ կապված Մյասնիկյան համայնքի ղեկավարն ասաց, որ  իր իմանալով պատճառը ֆինանսական խնդիրներն էին:

«Ասում են՝ ինչ որ պարտք են եղել իրեն, տարիների ընթացքում այդ պարտքը չեն վերադարձրել, իրենց մեջ խոսակցություններ են եղել և, երևի թե, հասցրել են էդ աստիճանի…»,- շարունակեց Բաղդասարյանը՝  հավելելով, որ այլ մանրամասների չի տիրապետում:

Հիշեցնենք՝ երեկ արյունալի միջադեպ է տեղի ունեցել Արագածոտնի մարզի Շամիրամ համայնքում, որի հետևանքով զոհվել է 4 մարդ: Նրանցից 3-ը մահացել են տեղում, իսկ չորրորդն ավելի ուշ՝ հիվանդանոցում, ևս  7 անձ վիրավոր են:

Շողիկ Գալստյան