12.10.2026 | 22:10
ԵՄ-ն հստակեցրել է իր դիրքորոշումը երևանյան COP17-ի համար
Անց է կացվել ազատ ըմբշամարտի Հայաստանի առաջնությունը
27.12.2018 | 18:59
ՀՀ սպորտի և երիտասարդության հարցերի նախարարության մարզաձևերի զարգացման հանրապետական համալիր կենտրոնի մարզադահլիճում / այն տասնամյակներ շարունակ կոչվել է «Արաքս», ապա ` կարճ ժամանակով ` «Միկա»/ անցկացվեց ազատ ըմբշամարտի Հայաստանի առաջնությունը: Մրցագորգ ելան 82 մարզիկներ: Հետաքրքիր գոտեմարտեր շատ եղան: Դա բացատրվում է այն բանով, որ մասնակիցներն ընթացիկ մրցաշրջանում միշտ եղել են ուսումնամարզական հավաքներում, մասնակցել են բազմաթիվ մրցումների և փաստորեն լավ մարզավիճակով ներկայացան մասնագետներին ու մարզասերներին: Միջոցառումը նաև ընտրական բնույթ կրեց: Աչքի ընկածներով կկազմավորվի երկրի հավաքական, որը նոր տարվա սկզբին, ստույգ ` հունվարի 15 –ին կմեկնի Իրան ` մասնակցելու Թախտիի անունը հավերժացնող միջազգային մրցաշարին: Դրա ավարտից հետո թիմն ամենայն հավանականությամբ Իրանում, տեղի ըմբիշների ընկերակցությամբ կանցկացնի ուսումնամարզական հավաք: Նպատակը Բուխարեստում ապրիլի 8- 14 –ը կայանալիք Եվրոպայի առաջնությունում հաջող մասնակցությունն է:
Անդրադառնալով Հայաստանի առաջնությանը, ասենք որ, անվանիներից բացի, լավ տպավորություն թողեցին նաև երիտասարդները, հատկապես Եվրոպայի երիտասարդական առաջնության 2018թ. չեմպիոններ, արտաշատցի Վազգեն Թևանյանը / 65 կգ /, երևանցի Արսեն Հարությունյանը / 61 կգ /, պատանեկան օլիմպիական խաղերի մրցանակակիրներ, գյումրեցի Վաղինակ Մաթևոսյանը / 57 կգ /, երևանցի Սարգիս Հովսեփյանը / 92 կգ /, որոնք դարձան չեմպիոններ: Հաղթողի կոչմանն արժանացան նաև վանաձորցի Հովհաննես Մխիթարյանը / 82 կգ /, Ապարանի տարածաշրջանի Քուչակ գյուղի պատվիրակ Անդրանիկ Գալստյանը / 125 կգ /, երևանցիներ Դավիթ Սաֆարյանը / 70 կգ /, Վարուժան Կաջոյանը / 74 կգ /, Գրիգոր Գրիգորյանը / 79 կգ / և Արման Մկրտչյանը / 97 կգ /:
