07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Արթուր Վանեցյանը ո՛չ հերքում, ո՛չ հաստատում է իր՝ փոխվարչապետ նշանակվելու տեղեկությունը
Քաղաքականություն
15.12.2018 | 17:52
Կան տեղեկություններ, որ ԱԱԾ տնօրեն Արթուր Վանեցյանը նշանակվելու է ՀՀ փոխվարչապետ։ ԱԱԾ ղեկավարը, սակայն, ոչ հերքում, ոչ էլ հաստատում է այս տեղեկությունը։
«20 տարեկանից աշխատել եմ Ազգային անվտանգության ծառայությունում, և այսօր ինձ համար պատիվ է ղեկավարել կառույցը, որում այսքան տարի աշխատել եմ։ Ես հուսով եմ, որ երկար տարիներ կշարունակեմ ծառայել։ Ինձ հետ որևէ մեկը չի խոսել իմ աշխատանքի փոփոխության հետ կապված, որևէ առաջարկ քաղաքական ղեկավարությունից, վարչապետի պաշտոնակատարից չեմ ստացել, և ես շարունակում եմ աշխատել որպես ԱԱԾ տնօրեն»,- Ծաղկաձորի «Արմենիա մարիոթ» հյուրանոցում հրավիրված ասուլիսում ասաց Ազգային անվտանգության ծառայության տնօրեն Արթուր Վանեցյանը։
Շեշտենք՝ Ազգային անվտանգության ծառայությունը հոգացել էր, որ Վանեցյանի ասուլիսն անցնի առանց ուղիղ հեռարձակման: «Մենք կնկարենք՝ տեսանյութը կտանք ձեզ»,- լրագրողների համառ պնդումներին՝ ասուլիսը ուղիղ հեռարձակել, այսպես էին պատասխանում ԱԱԾ պաշտոնյաները։
Մեր հարցին՝ ի՞նչ խնդիր է լուծում ԱԱԾ-ն թույլ չտալով հեռարձակել ասուլիսը, Արթուր Վանեցյանն ասաց, թե առանց դրա շփումն առավել անկաշկանդ կլինի։
Մինչ պարոն Վանեցյանի ասուլիսը ԱԱԾ աշխատակիցները լրագրողներին ներկայացրին ԱԱԾ կայքի նոր տարբերակը։
