Արմեն Գևորգյանը դատավորից արդար որոշում է սպասում. ինքնաբացարկ հայտնելու միջնորդություն չներկայացրին. ՏԵՍԱՆՅՈՒԹ

ՀՀ նախկին փոխվարչապետ Արմեն Գևորգյանին կալանավորելու գործով նիստը մինչև ժամը 15:00-ն ընդմիջվել է: Պաշտպանական կողմը պահանջել է լրացուցիչ նյութեր տրամադրել. «Հետագայում կալանավորման հիմքերի և պայմանների վիճարկման տեսանկյունից այդ նյութերը կարևոր են»,- ասաց Գևորգյանի պաշտպան, փաստաբան Էրիկ Ալեքսանյանը։

Նա չպատասխանեց հարցին, թե ըստ ՀՔԾ-ի՝ ումի՞ց է Արմեն Գևորգյանն առանձնապես խոշոր չափերի կաշառք վերցրել՝ պնդելով, թե նախաքննական գաղտնիք է: Պաշտպան Ալեքսանյանը չի կարողանում ասել, թե դատավորը ե՞րբ կալանքի հարցով որոշում կկայացնի: Փաստաբանի խոսքով՝ Արմեն Գևորգյանը ցուցմունք տվել է կաշառք վերցնելու և փողերի լվացման դրվագներով:

Հայտնի է, որ նա իրեն առաջադրված մեղադրանքները չի ընդունում: Մարտի 1-ի գործի հետ այս մասն արդյո՞ք կապ ունի. այս հարցով նույնպես փաստաբան Ալեքսանյանը չի մանրամասնել: Կան տեղեկություններ, որ գործարար Սիլվա Համբարձումյանն է Գևորգյանին կաշառք տալու մասին ցուցմունք տվել, փաստաբան Ալեքսանյանը չհերքեց և չհաստատեց: Նախաքննության գաղտնիությանը հղում անելով՝ փաստաբանը չմեկնաբանեց, թե Գևորգյանն առերեսվե՞լ է իր դեմ ցուցմունք տված անձի հետ: Արմեն Գևորգյանը հայտարարություն դեռ չի արել, քանի որ պաշտոնական կողմը դեռ չի անցել ներկայացված միջնորդության դեմ առարկություններ ներկայացնելուն:

Այսօր ժամը 10:30-ից մինչև 13:30 քննիչը դատական նիստի ընթացքում ներկայացրել է Արմեն Գևորգյանին կալանավորելու միջնորդությունը, պարզաբանվել են որոշ հարցեր: Արմեն Գևորգյանը դեռևս զերծ է մնում հայտարարել, թե իր դեմ քաղաքական հետապնդում է իրականացվում, ինչպես դա արել է Ռոբերտ Քոչարյանը:

Քննչական մարմինը կարծում է, որ ազատության մեջ մնալով՝ Արմեն Գևորգյանը կխոչընդոտի գործի նախաքննությանը, կթաքնվի քննությունից: Փաստաբան Էրիկ Ալեքսանյանը նշեց, որ կալանքի միջնորդությունը քննող դատավորի կողմից կանխակալ վերաբերմունք չկա, ինքնաբացարկ հայտնելու միջնորդություն չեն ներկայացրել, և ակնկալում են իրենց բավարարող որոշում: Գևորգյանի պաշտպանը հիշեցնում է, որ նա մինչ այս պահը չի թաքնվել նախաքննական մարմնից, և դա իրենց հիմնավորումներից մեկն է լինելու կալանքի միջնորդության դեմ առարկելիս: Պաշտպանները, հարկ եղած դեպքում, կմիջնորդեն գրավ կիրառել:

Փաստաբան Ալեքսանյանը հաստատեց, որ Գևորգյանին վերագրվող կաշառք ստանալու, փողերի լվացման և «Մարտի 1» -ի գործերը նույն վարույթում են քննվում։ Ըստ պաշտպանի՝ Ռոբերտ Քոչարյանի հետ Արմեն Գևորգյանը շփում կամ կապ չի ունեցել՝ հաշվի առնելով որ երկուսն էլ նույն գործով են անցնում։ Գևորգյանի պաշտպանն ասաց նաև, որ գործի մանրամասները Ռոբերտ Քոչարյանի պաշտպանների հետ չեն քննարկում։

Ռոբերտ Անանյան