Թեժ բանավեճ՝ Կառավարության նիստում․ ինչո՞ւ չեք շտապում վարչապետի հանձնարարականները կատարել․ ՏԵՍԱՆՅՈՒԹ

Կառավարության այսօրվա նիստում քննարկվեց պետական կառավարման ապարատում աշխատավարձերի բարձրացման ու դրա համար ծախսվող միջոցների հարցը։

Ըստ Ֆինանսների նախարարի պաշտոնակատար Ատոմ Ջանջուղազյանի՝ թեև իրենք բյուջետային քննարկումների ժամանակ  կաշկանդված չեն օրենքները փոխելով, սակայն պետք է հստակեցնեն պետական աշխատողի գործառույթն ու դրա համար վճարվող աշխատավարձի համարժեքությունը, ինչն անհրաժեշտ է ներկայացնել գործընկեր կառույցներին, օրինակ՝ Համաշխարհային բանկին։

Տնտեսական զարգացման և ներդրումների նախարարի պաշտոնակատար Տիգրան Խաչատրյանն էլ խնդրի վերաբերյալ նշեց, որ Հայաստանն իր հիմնական գործընկերոջ՝ Համաշխարհաին բանկի  հետ ունի երկխոսության և փոխադարձ ընկալման խնդիր․ «Համաշխարհային բանկի նպատակը մեկն է՝ համոզված լինել, որ մենք մեր որոշումներում ապահովելու ենք արդյունավետության երաշխիքներ»։

Նախարարի պաշտոնակատարի այս դիտարկմանն ի պատասխան՝ վարչապետի պաշտոնակատարը նկատեց․ «Փաստորեն, Համաշխարհային բանկը ավելի շատ է շահագրգռված մեր Կառավարության գործունեության արդյունավետությամբ, քան մե՞նք․ սա ամենամեծ պրոբլեմն է։ Եթե այստեղից դուրս կա մեկ մարմին կամ անհատ, որն ավելի շատ է մտահոգված ՀՀ Կառավարության գործունեության արդյունավետությամբ, ապա,  կներեք՝ էստեղից պետք է լուրջ հետևություններ անել»։

Տիգրան Խաչատրյանը հավելեց, որ գուցե իրենք ընդամենը լավ չեն կարողացել բացատրել իրենց պարզաբանումները Համաշխարհային բանկին, ինչին  ի պատասխան՝ Նիկոլ Փաշինյանն ասաց․ «Գնացե՛ք բացատրեք․ քաղաքական որոշումը կայացված է, ոնց ուզում եք բացատրեք»։

Մանրամասները՝ տեսանյութում։

Աղավնի Սուքիասյան