Հայաստանը տարածաշրջանային տեխնոլոգիական կենտրոն դարձնելու նպատակն ու TRIPP նախագիծը․ Պապոյանը՝ Ժնևում

ՀՀ էկոնոմիկայի նախարար Գևորգ Պապոյանը նոյեմբերի 10-ին Ժնևում անցկացվող Համաշխարհային ներդրումային 30-րդ համաժողովի շրջանակում ներկայացրել է Հայաստանի ներդրումային առաջնահերթությունները՝ առանձնացնելով տեխնոլոգիաների, արհեստական բանականության և կանաչ տնտեսության ոլորտները։

«Համաշխարհային ներդրումների հաջորդ տասնամյակը» խորագրով նախարարական քննարկմանը Պապոյանն ընդգծել է, որ Հայաստանը կարևորում է ոչ միայն կապիտալի ներհոսքը, այլև արտադրության զարգացումը, նոր տեխնոլոգիաների ներդրումն ու միջազգային փորձի փոխանակումը։

Նախարարը խոսել է Հայաստանը տարածաշրջանային տեխնոլոգիական կենտրոնի վերածելու նպատակի մասին՝ որպես նշանակալի ներդրումային նախաձեռնություն մատնանշելով «Firebird AI»-ի գործարանի նախագիծը։

Անդրադարձ է կատարվել նաև կանաչ ջրածնի և կենսագազի արտադրության հնարավորություններին, ինչպես նաև «Խաղաղության խաչմերուկ» նախաձեռնության և TRIPP նախագծի նշանակությանը՝ Հայաստանը տարածաշրջանային տրանսպորտային և լոգիստիկ հանգույց դարձնելու տեսանկյունից։

Էկոնոմիկայի նախարարության հաղորդագրությունը՝ ստորև․

ՀՀ էկոնոմիկայի նախարար Գևորգ Պապոյանը նոյեմբերի 10-ին Ժնևում անցկացվող Համաշխարհային ներդրումային 30-րդ համաժողովի շրջանակում մասնակցել է «Համաշխարհային ներդրումների հաջորդ տասնամյակը» խորագրով նախարարարական կլոր սեղան քննարկմանը։

Նախարարը ներկայացրել է Հայաստանի տնտեսության զարգացման հիմնական ուղղություններն ու ներդրումային առաջնահերթությունները և ընդգծել, որ Հայաստանը կարևորում է այնպիսի ներդրումների ներգրավումը, որոնք կապահովեն ոչ միայն կապիտալի ներհոսք, այլև կնպաստեն արտադրության զարգացմանը, նոր տեխնոլոգիաների ներդրմանն ու միջազգային փորձի փոխանակմանը։

Գևորգ Պապոյանը խոսել է նաև տեխնոլոգիաների և արհեստական բանականության ոլորտներում Հայաստանի ունեցած մեծ ներուժի ու զարգացման հեռանկարների մասին՝ կարևորելով երկիրը տարածաշրջանային տեխնոլոգիական կենտրոնի վերածելու ռազմավարական նպատակը։ Որպես այս ոլորտում նշանակալի ներդրումային նախաձեռնություն նախարարը մատնանշել է «Firebird AI»-ի գործարանի նախագիծը։

Նախարարն իր ելույթում անդրադարձել է նաև կանաչ տնտեսության ոլորտի զարգացմանը, մասնավորապես՝ կանաչ ջրածնի և կենսագազի արտադրության ծրագրերին, ինչպես նաև այս ուղղությամբ միջազգային գործընկերների հետ համագործակցության հնարավորություններին։

Գևորգ Պապոյանը կարևորել է «Խաղաղության խաչմերուկ» նախաձեռնության և TRIPP նախագծի նշանակությունը Հայաստանի՝ որպես տարածաշրջանային տրանսպորտային և լոգիստիկ հանգույցի կայացման գործում։

Քննարկմանը ներկա էին Շվեյցարիայի Համադաշնությունում ՀՀ արտակարգ և լիազոր դեսպան Հասմիկ Տոլմաջյանը, ՀՀ էկոնոմիկայի նախարարի տեղակալ Տիգրան Գասպարյանը և «Ներդրումների աջակցման կենտրոն» հիմնադրամի տնօրենի տեղակալ Արամ Վարդանյանը։