Սլովենիայի հետ առևտրատնտեսական համագործակցության թվերն աճում են, բայց կա նաև վատ նորություն. Միրզոյան․ ՏԵՍԱՆՅՈՒԹ

Հայաստան է ժամանել Սլովենիայի Հանրապետության արտաքին և եվրոպական գործերի նախարար Տոնե Կայզերը և նրա գլխավորած պատվիրակությունը, որը հանդիպում, ապա համատեղ մամուլի ասուլիս ունեցավ ՀՀ արտաքին գործերի և միջազգային առևտրի նախարար Արարատ Միրզոյանի հետ։

Բանակցությունների արդյունքում կողմերը ստորագրեցին արտաքին գործերի նախարարությունների միջև քաղաքական երկխոսության ընդլայնման մասին փոխըմբռնման հուշագիր։

Մամուլի ասուլիսի ժամանակ Արարատ Միրզոյանն իր գոհունակությունը հայտնեց երկկողմ քաղաքական երկխոսության ակտիվ դինամիկայի առնչությամբ՝ ընդգծելով, որ փաստաթուղթը նոր թափ կհաղորդի հարաբերությունների զարգացմանը։

Անդրադառնալով առևտրատնտեսական հարաբերություններին՝ նախարարը նշեց, որ ցուցանիշները դրական միտում ունեն․ ընթացիկ տարվա առաջին 8 ամիսների առևտրաշրջանառությունն արդեն իսկ գերազանցել է նախորդ ամբողջ տարվա ծավալները։ Այդուհանդերձ, ըստ նրա, ծավալները դեռևս փոքր են, և անհրաժեշտ են համատեղ ջանքեր դրանք մեծացնելու ուղղությամբ։

Միրզոյանը հայտնեց, որ այսօր Երևանում բացվելու է հայ-սլովենական գործարար համաժողով, իսկ հոկտեմբերի 30-ին նախատեսվում են «բիզնես-կառավարություն» ձևաչափով հանդիպումներ։ Ֆինանսական գործակցության շրջանակում նախարարը որպես հաջողված օրինակ մատնանշեց հայկական «Ինեկո» ընկերության կողմից սլովենական բանկերից մեկի բաժնետոմսերի ձեռքբերումը։

Երկկողմ օրակարգի առանցքային թեմաներից էին եղել նաև առողջապահությունը, կրթությունը, գիտությունը, արդարադատությունն ու տուրիզմը։ Միրզոյանը հատուկ շնորհակալություն հայտնեց սլովենական կողմին՝ Հայաստանում համապարփակ առողջապահական ապահովագրության համակարգի ներդրման գործում ցուցաբերած փորձագիտական աջակցության համար։

ՀՀ ԱԳ նախարարը բարձր գնահատեց նաև Սլովենիայի մարդասիրական ծրագրերը, որոնց շրջանակում արդեն մի քանի տարի շարունակ պատերազմից տուժած հայ երեխաներն ու նրանց ծնողները մեկնում են Սլովենիա՝ հոգեբանական և առողջապահական վերականգնողական աջակցություն ստանալու նպատակով։

Հանդիպմանը քննարկվել են նաև տարածաշրջանային զարգացումները։ Հայկական կողմը ներկայացրել է խաղաղության օրակարգն ու հարևանների հետ հարաբերությունների կարգավորման ընթացքը։ Միրզոյանը շնորհակալություն հայտնեց Սլովենիային՝ Հայաստանի խաղաղության նախաձեռնություններին, ինչպես նաև Հայաստան-Եվրամիություն գործընկերության խորացմանը լիակատար աջակցություն ցուցաբերելու համար։

Ելույթի ավարտին Արարատ Միրզոյանն ընդգծեց, որ երկու երկրների ժողովուրդներն ունեն բազմաթիվ նմանություններ, որոնցից մեկը սերն է մեղվաբուծության նկատմամբ։

«Հայաստանում խոսք կա՝ «աշխատել մեղվի պես», ինչը նշանակում է՝ աշխատել շատ և անդադար։ Լավ կլինի, որ մենք շարունակենք մեղվի պես աշխատել մեր օրակարգի առաջմղման ուղղությամբ»,— եզրափակեց իր խոսքը ՀՀ արտգործնախարարը։

Մանրամասները՝ տեսանյութում։

Ռոզա Վարդանյան