02.04.2026 | 21:16
«Գազպրոմը» հայտարարել է, թե Ռուսաստանում «Թուրքական հոսք» գազատարի վրա ԱԹՍ-ի հարձակումը հետ է մղվել
Երևանի քաղաքապետարանն ու Եվրոպական ներդրումային բանկը կհամագործակցեն «Խելացի քաղաք» հայեցակարգի շուրջ
27.07.2017 | 18:02
Երևանի քաղաքապետարանի և Եվրոպական ներդրումային բանկի հետ համատեղ իրականացվող ծրագրերի ընթացքի հետ կապված հարցեր են քննարկվել քաղաքապետ Տարոն Մարգարյանի և բանկի փոխնախագահ Վազիլ Հուդակի գլխավորած պատվիրակության հետ հանդիպման ժամանակ: Ողջունելով հյուրերին և կարևորելով Եվրոպական ներդրումային բանկի հետ համագործակցությունը, քաղաքապետ Տարոն Մարգարյանը նկատել է, որ իրականացվող համատեղ ծրագրերն իսկապես կարևոր են Երևան քաղաքի ենթակառուցվածքների զարգացման համար:
Այս մասին տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը։
«Մենք կարևորում ենք քաղաքային տնտեսության տարբեր ոլորտներում Եվրոպական ներդրումային բանկի հետ համագործակցությունը և պետք է ուրախությամբ նշեմ, որ արդեն իսկ ունենք կյանքի կոչված համատեղ հաջող ծրագրեր։ Այսօր շարունակում ենք ակտիվ փոխգործակցությունը մետրոյի վերակառուցման, կոշտ թափոնների կառավարման և էներգախնայողության ոլորտների ուղղությամբ: Վստահ եմ, որ այս ծրագրերի հաջող ընթացքն ու արդյունավետությունը հիմք կհանդիսանան, որ առաջիկա տարիներին ընդլայնենք համագործակցության շրջանակներն ու մեկնարկենք նոր ուղղություններ՝ մասնավորապես քաղաքային տրանսպորտի կանոնակարգման և վերելակային տնտեսության արդիականացման ու կառավարման ոլորտներում, որոնք այսօր Երևանի առաջնային խնդիրներից են», – նշել է քաղաքապետ Տարոն Մարգարյանն ու հավելել, որ Երևանի քաղաքապետարանն իր լիազորությունների շրջանակում բաց և պատրաստակամ է քննարկել բոլոր այն ծրագրերը, որոնք ուղղված են մայրաքաղաքի բնակիչների բարեկեցությանը:
Եվրոպական ներդրումային բանկի փոխնախագահ Վազիլ Հուդակն իր հերթին, շնորհակալություն հայտնելով քաղաքապետ Տարոն Մարգարյանին և Երևանի քաղաքապետարանի թիմին համատեղ արդյունավետ աշխատանքի համար, նշել է, որ համագործակցությունն իսկապես հաջողված է, արդյունքներն էլ՝ գոհացուցիչ:
«Պարոն քաղաքապետ, համատեղ բոլոր այն ծրագրերը, որ նախաձեռնվել են, ունեցել են հաջող ընթացք և գործնականում ապացուցել են իրենց արդյունավետությունը, ինչն իսկապես գոհացուցիչ է: Այս հարցում, անշուշտ, շատ մեծ է Ձեր անմիջական հետևողականության դերը, որն էլ բերում է ցանկալի արդյունքների: Օգտվելով առիթից, ուզում եմ նաև նշել, որ Երևանի զարգացման ուղղությամբ Ձեր կողմից նախաձեռնված քայլերի արդյունքները տեսանելի և զգալի են ամբողջ քաղաքում, ինչի ականատեսն ենք դառնում նաև մենք՝ շրջելով Երևանի փողոցներում: Եվ ես լիահույս եմ, որ մեր համագործակցությունն այսուհետ ևս կլինի փոխշահավետ և կապահովի այն արդյունքները, որոնք ակնկալվում են»,-ընդգծել է Վազիլ Հուդակը:
Հանդիպման ընթացքում կողմերը պայմանավորվել են համագործակցել նաև «Խելացի քաղաք» հայեցակարգի համատեքստում՝ հիմնվելով միջազգային լավագույն փորձի վրա:
