14.10.2026 | 13:14
Սաուդյան Արաբիան հայտնել է նավթային հսկա Aramco-ի շենքին հութիների հրթիռային հարվածների մասին․ չորս մարդ է վիրավորվել
Վատիկանը հաստատել է, որ Հռոմի պապ Լևոն XIV-ը վիրահատվել է թոքերի քաղցկեղի պատճառով
Քաղաքականություն
14.10.2026 | 11:32
Հռոմի պապ Լևոն XIV-ը վիրահատության է ենթարկվել, նրա թոքի ստորին հատվածից հանգույց է հեռացվել, որը, ինչպես հետագայում պարզվել է, քաղցկեղային բնույթ է ունեցել, հաղորդում է Վատիկանը։ Նշվում է, որ միջամտությունից հետո պապը «նորմալ է արթնացել», գրում է DW-ն։
«Միջամտությունը հաջողությամբ է ավարտվել՝ նախատեսված ժամկետում և ծրագրի համաձայն»,- ասվում է Վատիկանի կարճ հաղորդագրության մեջ։
Բժշկական տեղեկագրում Վատիկանը հայտնել է, որ հեռացվել է Հռոմի պապի աջ թոքի ստորին բլթակը, նրա մոտ ախտորոշվել է թոքի ադենոկարցինոմա՝ թոքի քաղցկեղի տարածված տեսակ։ Ախտորոշման կասկածներ առաջացել էին նախավիրահատական հետազոտությունների արդյունքում, իսկ վիրահատության ընթացքում այն հաստատվել է, հավելել է Սուրբ Աթոռը։
Հռոմի պապին վիրահատել են «Ջեմելի» հիվանդանոցում, որը տասնամյակներ շարունակ պապերի բուժման հիմնական կենտրոնն է։ Հայտարարության համաձայն՝ Լևոն XIV-ի ապաքինումը կտևի շուրջ մեկ շաբաթ։ Ուռուցքաբանների կարծիքով՝ Լևոն XIV-ի ապաքինման կանխատեսումը շատ բարենպաստ է, քանի որ չարորակ հանգույցը հայտնաբերվել է շատ վաղ փուլում։
AFP-ի Վատիկանի աղբյուրի փոխանցմամբ՝ լրացուցիչ հետազոտություններ են անցկացվում՝ պարզելու համար՝ արդյո՞ք քաղցկեղը տարածվել է։
71-ամյա Լևոն XIV-ը կիրակի աղոթքից հետո հազարավոր հավատացյալներին հայտնել էր իր առողջական խնդրի մասին՝ զգալիորեն ավելի բաց մոտեցում ցուցաբերելով իր առողջության վերաբերյալ տեղեկատվության հրապարակման հարցում, քան իր նախորդները։ Նախկինում Վատիկանը հաճախ քննադատության էր ենթարկվում պապերի առողջական վիճակի վերաբերյալ շփոթեցնող կամ չափազանց անորոշ հայտարարություններ անելու, իսկ երբեմն էլ՝ ընդհանրապես տեղեկություններ չհրապարակելու համար։
Պապի բոլոր միջոցառումները չեղարկվել են մինչև հոկտեմբերի 20-ը։ Հավանական է, որ նոյեմբերին նա կկատարի Հարավային Ամերիկա նախատեսված այցը։
Թարգմանությունը՝ Էմմա Չոբանյանի
