12.10.2026 | 12:10
Տուգանք՝ վթարից հետո 15 րոպեում ճանապարհը չազատելու համար // Արարատ Միրզոյանը Լեհաստան է մեկնել․ ԼՈՒՐԵՐ
Երևանում ավելի քան 1 կգ մարիխուանա է հայտնաբերվել․ 4 անձ կալանավորվել է
Հասարակություն
12.10.2026 | 10:15
Երևանում թմրամիջոցների ապօրինի շրջանառության կասկածանքով ձերբակալվել, ապա կալանավորվել է չորս տղամարդ՝ երկու ՀՀ քաղաքացի և երկու օտարերկրացի։ ՆԳՆ ոստիկանության հաղորդմամբ՝ հոկտեմբերի 5-ին իրականացված խուզարկությունների արդյունքում ավտոմեքենայում և հոսթելում հայտնաբերվել է ընդհանուր առմամբ ավելի քան 1 կգ մարիխուանայի նմանվող զանգված, ինչպես նաև էլեկտրական կշեռք։ Նախաձեռնվել է քրեական վարույթ։
ՆԳՆ ոստիկանության հաղորդագրությունը՝ ստորև․
«Քրեական ոստիկանության Երևան քաղաքի վարչության թմրամիջոցների ապօրինի շրջանառության դեմ պայքարի բաժնի ծառայողները թմրանյութ իրացնելու վերաբերյալ ստացած օպերատիվ հերթական տեղեկությունն իրացրել են հոկտեմբերի 3-ին։
«Ժամը 16։30-ին քրեական ոստիկանները մայրաքաղաքի Ծիծեռնակաբերդի խճուղում ձերբակալեցին և վարչություն տեղափոխեցին երկու հայ և երկու օտարերկրացի տղամարդու։
Նրանց վարած «Տոյոտա» և «Հյունդայի» մակնիշի մեքենաները, որոնցից մեկում իրավապահները նկատել էին թմրանյութի նմանվող զանգված, կնիքվեցին պահպանվող հատուկ տարածքում։
Աբովյան քաղաքի բնակիչ 31-ամյա տղամարդու խուզարկությամբ հայտնաբերվեց մոխրացած հետքերով ապակյա գլանակ։
Նախաձեռնվեց քրեական վարույթ, որի շրջանակում հոկտեմբերի 5-ին, դատարանի որոշման հիման վրա, կատարվեցին խուզարկություններ։ 31-ամյա տղամարդու վարած «Տոյոտա» մակնիշի ավտոմեքենայում հայտնաբերվեց 300 գրամից ավելի մարիխուանայի նմանվող զանգված, իսկ մայրաքաղաքի Խանջյան փողոցում գտնվող հոսթելում, որտեղ փաստացի բնակվում էր 37-ամյա օտարերկրացին, հայտնաբերվեց շուրջ 760 գրամ մարիխուանայով լցված 6 փաթեթ և էլեկտրական կշեռք։
Չորսն էլ կալանավորվել են։ Նախաքննությունը շարունակվում է»,- ասվում է հաղորդագրության մեջ։
