05.10.2026 | 16:03
Կրեմլը մեկնաբանել է Ռուսաստանում ժանտախտի տարածման մասին հաղորդումները
Ֆրանսիայում մինչև 500 դպրոց փակ կլինի՝ աշակերտների բողոքի ակցիաների ֆոնին
Քաղաքականություն
05.10.2026 | 14:52
Ֆրանսիայի մինչև 500 դպրոց այսօր մասամբ կամ ամբողջությամբ փակ կլինի՝ վերջին օրերին ոստիկանության հատուկ նշանակության ուժերի և ուսանող ցուցարարների միջև բախումներից հետո: Այս մասին հայտարարել է Ֆրանսիայի կրթության նախարար Էդուար Ժեֆրեն, գրում է BBC-ին։
«Շուրջ 400-500 ավագ դպրոցներում դասերն ամբողջությամբ կամ մասամբ կդադարեցվեն, քանի որ անվտանգության պայմանները ապահովված չեն»,- ասել է նա։
Ժեֆրեն նաև հայտնել է, որ բողոքի ակցիաների մեկնարկից ի վեր 24 դպրոց «հրկիզվել կամ թալանվել է»։
Հազարավոր ուսանողներ բողոքի ակցիաներ են անցկացնում կրթության որակի և պայմանների դեմ։ Անցած շաբաթ սկսված ցույցերը Փարիզից տարածվել են նաև այլ քաղաքներ, այդ թվում՝ Մոնպելյե, Նանտ և Մարսել։ Ավագ դպրոցների աշակերտներն ու այլ ցուցարարներ դժգոհում են ուսուցիչների պակասից, գերբեռնված դասարաններից և անմխիթար վիճակում գտնվող դպրոցական շենքերից։
Ուրբաթ Ֆրանսիայի արդարադատության նախարար Ժերալդ Դարմանինը հայտնել է, որ Ֆրանսիայի 3700 դպրոցներից 735-ը «այս կամ այն կերպ» տուժել են բռնի բողոքի ակցիաներից։
Կրթության նախարարը նախազգուշացրել է, որ հնարավոր է՝ տուժած դպրոցների թիվը համադրելի լինի ուրբաթ օրվա ցուցանիշի հետ, սակայն խոստացել է «դասերի մասնակի և աստիճանական վերականգնում»։ Ժեֆրեն հավելել է, որ կրթական ոլորտի 78 աշխատակից է վիրավորվել։
Ֆրանսիայի ներքին գործերի նախարար Լորան Նունյեսի տվյալներով՝ ուրբաթ ձերբակալվել է 1,747 մարդ։ AFP գործակալության տվյալներով՝ շարժման սկզբից ի վեր ձերբակալվել է ավելի քան 5000 մարդ, որոնցից մոտ 85%-ն անչափահասներ են։
Ցույցերի կազմակերպիչները կոչ են արել բողոքի ակցիաները շարունակել նաև երեքշաբթի՝ կառավարությանը «կոնկրետ միջոցներ» չձեռնարկելու մեջ մեղադրելով, հայտնում է AFP-ն։
Կիրակի Ֆրանսիայի վարչապետ Սեբաստիան Լըկորնյուն հայտարարել է, որ իր կառավարությունը լրացուցիչ քայլեր է ձեռնարկում՝ «ավագ դպրոցների աշակերտների և կրթական ոլորտի աշխատակիցների առջև ծառացած դժվարություններին» արձագանքելու համար։ Նրա խոսքով՝ այդ քայլերը ներառում են դասերի շարունակականության ապահովում, դպրոցների պայմանների բարելավում, ուսումնական օրվա ավելի լավ կազմակերպում և ֆրանսիական բուհերի ընդունելության հարթակն ավելի թափանցիկ դարձնելը։
Թարգմանությունը՝ Էմմա Չոբանյանի
