ԵՄ Խորհուրդը պաշտոնապես ընդունեց հայկական արտադրանքի համար երկամյա առևտրային արտոնությունները

ԵՄ Խորհուրդը միաձայն կողմ քվեարկեց ժամանակավոր առևտրային արտոնություններին՝ ԵՄ շուկա հայկական արտահանման մուտքը հեշտացնելու և Ռուսաստանի սահմանափակումների ազդեցությունը մեղմելու նպատակով։

Որոշումը կայացվեց Մրցունակության հարցերով խորհրդի նիստում՝ որպես «A» կետ, այսինքն՝ առանց առանձին նախարարական քննարկման։ Այն հաջորդում է Եվրոպական խորհրդարանի սեպտեմբերի 15-ի դրական քվեարկությանը՝ Եվրահանձնաժողովի առաջարկի վերաբերյալ առանց փոփոխությունների։

Արտոնյալ ռեժիմը նախատեսում է լայն շրջանակի ապրանքների, ներառյալ որոշ գյուղատնտեսական արտադրատեսակների, համար ներմուծման մաքսատուրքերի կասեցում։ Այն կգործի երկու տարի՝ կանոնակարգի ուժի մեջ մտնելու օրվանից։

«Մենք ուժեղացնում ենք մեր աջակցությունը Հայաստանին և նրա ժողովրդին, որը, չնայած արտաքին ճնշումներին, հստակորեն ընտրել է եվրոպամետ ուղին։ Այսօրվա որոշումը կօգնի առևտրային սահմանափակումներից տուժած Հայաստանի տնտեսությանը և ցույց է տալիս, որ մեր գործընկերները միշտ կարող են հույս դնել ԵՄ-ի վրա»,- հայտարարել է ԵՄ նախագահող երկրի՝ Իռլանդիայի արտաքին գործերի և առևտրի նախարար Հելեն ՄակԷնթին։

Խորհուրդը նշել է, որ ռեժիմը համահունչ է Համապարփակ և ընդլայնված գործընկերության համաձայնագրի՝ CEPA-ի նպատակներին և պետք է նպաստի Հայաստանից դեպի ԵՄ առևտրային հոսքերի աջակցմանն ու ընդլայնմանը։
Միաժամանակ արտոնությունները տրվում են որոշակի պայմաններով և ներառում են ԵՄ շուկայի պաշտպանական մեխանիզմներ։ Եթե Հայաստանից ներմուծումը բացասաբար ազդի եվրոպացի արտադրողների վրա, ԵՄ-ն կարող է միջամտել և կիրառել պաշտպանական միջոցներ։
Կանոնակարգն այժմ կստորագրվի և կհրապարակվի Եվրոպական միության Պաշտոնական տեղեկագրում։ Այն ուժի մեջ կմտնի հրապարակմանը հաջորդող օրը և այդ օրվանից կգործի երկու տարի։

Կարինե Ասատրյան
Բրյուսել