Կիևում ռուսական հարձակման հետևանքով տուժել է 16 մարդ, Օդեսայում ՝ բնակելի շենք վնասվել

Ռուսական զորքերը սեպտեմբերի լույս 17-ի գիշերը հրթիռներով և անօդաչու թռչող սարքերով հերթական հարվածներն են հասցրել Ուկրաինայի տարածքին։ Կիևում ռուսական հարձակման հետևանքով վնասվել են պահեստներ, գրասենյակային տարածքներ և բազմահարկ բնակելի շենքեր, հայտնել է քաղաքապետ Վիտալի Կլիչկոն, փոխանցում է Meduza-ն։

Ուկրաինայի Արտակարգ իրավիճակների պետական ծառայության վերջին տվյալներով՝ տուժել է 16 մարդ, այդ թվում՝ 10 և 12 տարեկան երեխաներ։ «Украинская правда»-ն գրում է, որ տուժածների մեծ մասը Դնեպրի շրջանում գտնվող 16 հարկանի բնակելի շենքի բնակիչներ են, որին հարվածել է անօդաչու թռչող սարքը։

Օդեսայում ռուսական հարվածների հետևանքով վնասվել է 19 հարկանի շենք, տուժել է վեց մարդ, այդ թվում՝ երկու երեխա, հայտնել է քաղաքի ռազմական վարչակազմի ղեկավար Սերգեյ Լիսակը։

ՌԴ Պաշտպանության նախարարությունը հայտարարել է, որ գիշերը հարվածներ են հասցվել Ուկրաինայի մետալուրգիական և ռադիոէլեկտրոնային արդյունաբերության, ռազմարդյունաբերական համալիրի ձեռնարկություններին, Կիևում, Զապորոժիեում և Օդեսայի մարզում էներգետիկ ու տրանսպորտային ենթակառուցվածքի օբյեկտներին, ինչպես նաև Ուկրաինայի զինված ուժերի շահերից ելնելով օգտագործվող ծովային նավերին։

Միաժամանակ, Ուկրաինայի ռազմաօդային ուժերի հաղորդմամբ՝ երկիրը ենթարկվել է «Օնիքս» հականավային պաշտպանության հրթիռների, «Իսկանդեր» բալիստիկ հրթիռների, չորս «Կալիբր» թևավոր հրթիռների, 10 «Բանդերոլ» անօդաչու թռչող սարքերի և 157 «Շահեդ» հարվածային անօդաչու թռչող սարքերի հարձակման։

Հարվածի հիմնական ուղղություններն են եղել Կիևի, Զապորոժիեի և Օդեսայի մարզերը, ասվում է հաղորդագրության մեջ։ Ռուսական զինուժը վերջին 10 օրվա ընթացքում առաջին անգամ Կիևի վրա հարձակում է իրականացրել բալիստիկ և թևավոր հրթիռներով։ ՀՕՊ ուժերին չի հաջողվել խոցել հրթիռներից որևէ մեկը, հաջողվել է խոցել միայն 131 անօդաչու թռչող սարք։

Թարգմանությունը՝ Էմմա Չոբանյանի