Իհարկե պատրաստվում եմ առաջիկա ընտրություններին. Տիգրան Ավինյան. ՏԵՍԱՆՅՈՒԹ

Երևանի մուտքերի մոտ և Փոքր կենտրոնի հարակից հատվածներում սեպտեմբերի 29-ին նոր տեսախցիկներ կտեղադրվեն։ Այս մասին Factor TV-ի հետ զրույցում հայտարարել է Երևանի քաղաքապետ Տիգրան Ավինյանը՝ նշելով, որ տեսախցիկների միջոցով քաղաքապետարանը կկարողանա ամբողջականացնել տրանսպորտային հոսքերի վերաբերյալ վերլուծական աշխատանքը։

Անդրադառնալով միջմարզային տրանսպորտի՝ Երևանում կանգառներից օգտվելու խնդրին՝ Ավինյանը պնդել է, որ մարզային տրանսպորտն իրավունք չունի Երևանի կանգառներում ուղևորափոխադրում իրականացնել։

«Մարզային տրանսպորտը առհասարակ իրավունք չունի Երևան քաղաքի կանգառներում իրականացնել ուղևորափոխադրություն, և դա փաստացի անօրինական գործունեություն է»,- ասել է նա։

Քաղաքապետի խոսքով՝ խնդիրը միայն միջմարզային տրանսպորտի սահմանափակումը չէ, այլ Երևանում հասարակական տրանսպորտի միասնական և համակարգված կազմակերպումը։

«Մեր խնդիրը այդտեղ ոչ թե հենց միջմարզային տրանսպորտն է, այլ մեկ կենտրոնից գրագետ ձևով Երևան քաղաքում հասարակական տրանսպորտի կազմակերպումն է»,- նշել է Ավինյանը։

Նա նաև հայտնել է, որ ուղևորների համար հնարավոր է ներդրվեն միասնական քարտեր։ Ըստ քաղաքապետի՝ միջմարզային և քաղաքային տրանսպորտի վերակազմակերպման վերջնական լուծումները պետք է հստակ լինեն այս տարվա ընթացքում, որպեսզի դրանց իրականացումը սկսվի հաջորդ տարի։

Ավինյանը տեղեկացրել է նաև, որ Երևանում արդեն առանձնացվել են նոր ավտոկայանատեղիների համար նախատեսված տարածքներ՝ քաղաքի տարբեր հատվածներում, հատկապես մուտքերի մոտ։ Դրանք նախատեսված են մեքենաները թողնելու և ճանապարհը հասարակական տրանսպորտով շարունակելու համար։

«Վստահաբար, մեր 60 մարդատար ավտոմեքենայի փոխարեն մեկ ավտոբուսը բավարար է, որպեսզի այդ քանակի մարդկանց տեղափոխի»,- ասել է նա։

Քաղաքապետն անդրադարձել է նաև տրանսպորտի հնարավոր թանկացման մասին խոսակցություններին։ Նրա խոսքով՝ գործող փաթեթների գները պահպանվելու են, իսկ միակ հնարավոր փոփոխությունը կարող է վերաբերել մեկանգամյա ուղևորության արժեքին։

«Միակ բանը, որ կարող է տեղի ունենալ, դա տարեկան 10 դրամով մեկանգամյա ուղևորափոխադրման գնի փոփոխությունն է, բայց դեռևս նմանատիպ որոշում չունենք Երևանի քաղաքապետարանում և ավագանիում»,- նշել է Ավինյանը։

Միաժամանակ նա հայտնել է, որ քաղաքային տրանսպորտի երթուղիները պետք է վերակազմակերպվեն՝ ավելի շատ տրանսպորտ հատկացնելով գերծանրաբեռնված ուղղություններին և նվազեցնելով թերծանրաբեռնված ուղղությունները։

Քաղաքապետի խոսքով՝ Փոքր կենտրոնի որոշ հատվածներում կայանման սահմանափակումներն արդեն իրականացվում են, մասնավորապես այն վայրերում, որտեղ կայանված մեքենաները խոչընդոտում են երթևեկությանը։

Որպես օրինակ՝ նա նշել է Նալբանդյան փողոցը, որտեղ թեք կայանման ձևաչափը փոխվում է՝ դառնալով ուղիղ կայանում։

Ավինյանը վստահեցրել է, որ Աջափնյակի մետրոյի կայարանը կառուցվելու է։ Նրա խոսքով՝ այս պահին քննարկումներ են ընթանում նաև ռուսական ներգրավվածության վերաբերյալ։

«Մենք այս պահին քննարկումների մեջ ենք, հենց նորություն ունենանք, այդ պրոցեսը հրապարակային կլինի»,- ասել է քաղաքապետը։

Նա նշել է, որ Աջափնյակի մետրոյի կայարանի շինարարությունը նախատեսվում է սկսել հաջորդ տարի։

Անդրադառնալով ավագանու առաջիկա ընտրություններին՝ Ավինյանը հաստատել է, որ «Քաղաքացիական պայմանագիրը» մասնակցելու է ընտրություններին, և ինքը հենց դրան է պատրաստվում, սակայն չի հստակեցրել՝ արդյոք ինքն է լինելու կուսակցության թեկնածուն։

«Իհարկե պատրաստվում եմ առաջիկա ընտրություններին, վստահորեն պատրաստվում ենք առաջիկա ընտրություններին, որովհետև «Քաղաքացիական պայմանագիր» կուսակցությունը մասնակցելու է առաջիկա ընտրություններին։ Ես կարծում եմ, որ որևէ պարագայում, ինչ էլ որ մենք որոշենք, «Քաղաքացիական պայմանագիր» կուսակցությունը ճիշտ որոշում կընդունի»,- ասել է նա։

Հարցին՝ հնարավո՞ր է «Քաղաքացիական պայմանագրի» թեկնածուն լինի ԱԽ քարտուղար Ալեն Սիմոնյանը, Ավինյանը պատասխանել է, որ այդ մասին հայտնի կդառնա որոշման կայացումից հետո։

«Ես կարծում եմ՝ մեր որոշման մասին դուք կիմանաք այն պահին, երբ որ այդ որոշումը կայացվի։ Դեռևս չենք պլանավորում, երկու տարի ունենք»,- ասել է նա՝ պատասխանելով թեկնածուի շուրջ քննարկումների ժամկետի մասին հարցին։

Մանրամասները՝ տեսանյութում։

Արփի Հակոբյան