16.09.2026 | 11:33
Ռուսական գազի գինը կարող է փոխվել․ ի՞նչ այլընտրանք ունի Հայաստանը
Եվրահանձնաժողովն իր զեկույցում անդրադարձել է Հայաստանին․ կլինի՞ ՀՀ-ն 2027թ-ի՝ ԵՄ-ի առաջնահերթություններում
Քաղաքականություն
16.09.2026 | 10:44
Այսօր՝ սեպտեմբերի 16-ին, եվրոպական քաղաքական համայնքի ուշադրության կենտրոնում Եվրոպական խորհրդարանն է, որտեղ Եվրահանձնաժողովի նախագահ Ուրսուլա ֆոն դեր Լայենը գործող մանդատի շրջանակում երկրորդ անգամ հանդես է գալու «Եվրամիության վիճակի մասին» իր ամենամյա ուղերձով (SOTEU)։
Ստրասբուրգում Ուրսուլա ֆոն դեր Լայենը կամփոփի անցած մեկ տարվա ընթացքում Եվրոպական հանձնաժողովի գործունեությունը և կներկայացնի առաջիկա տարվա քաղաքական առաջնահերթություններն ու նախաձեռնությունները։
Եվրահանձնաժողովի նախագահը ելույթ կունենա ու պատգամավորների հարցերին կպատասխանի մոտ 3 ժամ՝ տեղական ժամանակով առավոտյան 9։00-ից մինչև 11։50-ը։ Ակնկալվում է բուռն բանավեճ․ քաղաքական խմբերը տարաձայնություններ ունեն Հանձնաժողովի տնտեսական ու կլիմայական քաղաքականության, միգրացիայի, սոցիալական ծախսերի և ԵՄ կարգավորիչ դերակատարության շուրջ։
Եվրահանձնաժողովի մամուլի ծառայության փոխանցմամբ՝ ֆոն դեր Լայենի ելույթի առանցքում կլինի Եվրոպայի անկախության ու անվտանգության ամրապնդումը՝ աշխարհաքաղաքական լարվածության, տնտեսական մասնատման և գլոբալ մրցակցության պայմաններում։
2025 թվականի «Եվրամիության վիճակի մասին» ուղերձից հետո Հանձնաժողովը կենտրոնացել է ԵՄ մրցունակության բարձրացման, ներդրումների և նորարարությունների համար պայմանների բարելավման, ինչպես նաև արդյունաբերության դիմակայունության ամրապնդման վրա։ Բրյուսելը հայտարարել է արտաքին վտանգավոր կախվածությունները նվազեցնելու, շուկայական շեղումներից և համաշխարհային գերարտադրության ազդեցությունից եվրոպական արտադրողներին պաշտպանելու քայլերի մասին։
Խոստումից մինչև առաջընթաց
Սեպտեմբերի 16-ին ընդառաջ Եվրոպական հանձնաժողովը հրապարակել է «Եվրոպական միության վիճակը 2026. Խոստումից մինչև առաջընթաց» զեկույցը, որն ամփոփում է Եվրահանձնաժողովի նախագահ Ուրսուլա ֆոն դեր Լայենի գլխավորած կազմի աշխատանքի երկրորդ տարվա արդյունքները։
88 էջանոց զեկույցում ներկայացված են Եվրոպայի տնտեսական մրցունակության, էներգետիկ անկախության, պաշտպանական միության ձևավորման և անվտանգության ամրապնդմանն ուղղված առանցքային նախաձեռնությունները։
Հանձնաժողովը և ԵՄ-ն նաև շարունակել են իրենց աներեր աջակցությունը Ուկրաինային՝ ներառյալ 90 միլիարդ եվրոյի աջակցության վարկի առաջին տրանշների հատկացումը, անդամակցության բանակցային երկու խմբերի (կլաստերների) բացումը և Ռուսաստանի դեմ պատժամիջոցների 21-րդ փաթեթի ընդունումը։
Փաստաթղթում անդրադարձ կա նաև Հայաստանի հետ համագործակցությանը։
Հայաստանը ՝ Եվրահանձնաժողովի զեկույցում
Այս տարվա մայիսին Եվրամիությունը Հայաստանի հետ անցկացրել է իր պատմության մեջ առաջին գագաթնաժողովը՝ նպատակ ունենալով աջակցել տարածաշրջանային խաղաղությանն ու կայունությանը: Գագաթնաժողովի շրջանակում մեկնարկել է ԵՄ-Հայաստան Փոխկապակցվածության գործընկերությունը (Connectivity Partnership), որը կարևոր քայլ է երկկողմ տրանսպորտային, էներգետիկ և թվային կապերի ամրապնդման ուղղությամբ:
Եվրոպական հանձնաժողովի նախագահ Ուրսուլա ֆոն դեր Լայենը հուլիսին, այս տարվա ընթացքում արդեն երկրորդ անգամ, այցելել է Հայաստան: Նա այցելել է նաև Ադրբեջան՝ ընդգծելով Եվրոպայի հանձնառությունը՝ աջակցելու երկու երկրների միջև խաղաղությանն ու բարիդրացիական հարաբերությունների հաստատմանը:
Տարածաշրջանային այցի ընթացքում նախագահը հայտարարել է նոր՝ 200 միլիոն եվրո արժողությամբ «Գլոբալ դարպաս» (Global Gateway) փաթեթի մասին:
Ծրագիրը միտված է Հարավային Կովկասում փոխկապակցվածության միջոցով խաղաղության ամրապնդմանը և ունի մինչև 2 միլիարդ եվրոյի պետական ու մասնավոր ներդրումներ ներգրավելու ներուժ:
Բացի այդ, Ուրսուլա ֆոն դեր Լայենն ազդարարել է Հայաստանի համար առևտրային լրացուցիչ միջոցառումների, ինչպես նաև ԵՄ-Ադրբեջան Փոխկապակցվածության գործընկերության մեկնարկի մասին:
Լուսանկարում՝ ՀՀ վարչապետ Նիկոլ Փաշինյանն ու Եվրոպական հանձնաժողովի նախագահ Ուրսուլա ֆոն դեր Լայենը, Երեւան, 2026, հուլիս
Կարինե Ասատրյան
Բրյուսել
