«Պերաշկու գործով» ես ինձ տուժող եմ համարում. «Ուժեղ Հայաստան»-ի պատգամավոր․ ՏԵՍԱՆՅՈւԹ

ԱԺ տնտեսական հարցերի մշտական հանձնաժողովի փոխնախագահի «Ուժեղ Հայաստան» խմբակցության թեկնածու Վրույր Այվազյանը, նիստի ընթացքում պատասխանելով ՔՊ-ական պատգամավոր Վոլոդյա Հակոբյանի հարցին, անդրադարձավ այն երկու քրեական գործերին, որտեղ մեղադրյալի աթոռին է։ Նրա խոսքով՝ գործերից մեկը հանրության շրջանում հայտնի է որպես «պերաշկու գործ», իսկ երկրորդը կապված է Գյուլագարակ համայնքի հողամասերի հետ։

«Հիմա իմ աչքը բորբոքված է, այս վիճակով ես երկու ամիս տնային կալանք եմ կրել, որի ընթացքում բժշկական օգնություն չեմ ստացել, ինչի հետևանքով հիմա աչքս վիրահատության կարիք ունի։ Շատ չեմ խոսի, միայն կասեմ, որ դրանք քաղաքական մոտիվներով գործեր են, բայց «պերաշկու գործով» ես ավելի շատ ինձ տուժող եմ համարում։ Հանգամանքների մեջ չեմ ուզում խորանալ, չեմ ուզում որևէ ձև նսեմացնել պետական կամ իրավապահ որևէ մարմնի աշխատանք, թողնում եմ դատարանի արդարամտությանը»,- նշեց Այվազյանը։

Անդրադառնալով Գյուլագարակի հողերի մասով նախաձեռնված վարույթին, որն այժմ դատարանում է, պատգամավորը պարզաբանեց, որ խոսքը 3.8 հեկտար վարելահողի և խոտհարքի մասին է, որոնք, ըստ նրա, երբեք համայնքին չեն պատկանել, այլ 1991 թվականից եղել են իր ընտանիքի սեփականությունը։ Նրա խոսքով՝ այդ հողերը ինքը որոշակի հանգամանքներից ելնելով է փոխանցել համայնքին։

Քննարկման ընթացքում հնչեց նաև տնտեսական իրավիճակին վերաբերող հարցադրում։ Այվազյանը նշեց, որ ներկայում տնտեսական աճ կա, սակայն իր գնահատմամբ, դա ժամանակավոր է և կախված է արտաքին գործոններից։ Նա շեշտեց, որ երկրի համար առաջնային է ոչ թե կարճաժամկետ հաջողությունը, այլ կայուն զարգացումը, որը չի հիմնվի արտաքին հակամարտությունների վրա։

Նրա խոսքով՝ տնտեսական քաղաքականության մեջ պետք է թեթևացնել փոքր և միջին բիզնեսի հարկային բեռը, որպեսզի դրանք կարողանան ավելի ազատ գործունեություն ծավալել և նպաստել տնտեսական աշխուժությանը։

Մանրամասները՝ տեսանյութում։

Ռոզա Վարդանյան