Թրամփն ու Պուտինը մեկժամյա հեռախոսազրույց են ունեցել

ՌԴ նախագահ Վլադիմիր Պուտինը հեռախոսազրույց է ունեցել ԱՄՆ նախագահ Դոնալդ Թրամփի հետ Սպիտակ տան ներկայացուցիչների՝ Մոսկվա և Կիև կատարած այցերի արդյունքների հետ կապված։ Զրույցը տևել է ուղիղ մեկ ժամ։ Այս մասին հայտնել է ՌԴ նախագահի օգնական Յուրի Ուշակովը, գրում է Ինտերֆաքսը։

«Առաջնորդներին բնորոշ փոխադարձ հարգանքի և գործնական մթնոլորտում նրանք կարծիքներ են փոխանակել սեպտեմբերի 5-6-ը ԱՄՆ նախագահի հատուկ ներկայացուցիչ Սթիվ Ուիթքոֆի և Ջարեդ Քուշների՝ Մոսկվա և Կիև կատարած այցերի արդյունքների վերաբերյալ», – շարունակել է նա։

Նրա խոսքով՝ «զրույցը տևել է ուղիղ մեկ ժամ, եղել է կառուցողական և բավական անկեղծ»։

«Տրվել է օբյեկտիվ և մանրակրկիտ վերլուծություն այն մասին, թե ինչ է կատարվում ներկայումս հատուկ ռազմական գործողության ընթացքում (Մոսկվան այսպես է անվանում Ուկրաինայի դեմ պատերազմը) և, ընդհանուր առմամբ, թե ինչպես ենք մենք տեսնում մարտադաշտում առաջընթացի և հատուկ ռազմական գործողության նպատակներին ու խնդիրներին հասնելու հեռանկարները։ Ի դեպ, նա (Ռուսաստանի նախագահը.) ուրվագծել է, թե ինչ կարող են իրատեսորեն անել ամերիկացիները ռազմական գործողությունները շուտափույթ  դադարեցնելու համար», – ասել է  նա։

Զրույցի ընթացքում, ըստ Ուշակովի, Պուտինը «դրական է գնահատել ամերիկյան կողմի և անձամբ Դոնալդ Թրամփի միջնորդական ջանքերը՝ ուկրաինական հակամարտության կարգավորման ուղիներ գտնելու գործում»։ Պուտինը նաև նշել է, թե Ռուսաստանը «նույնիսկ մտքում Եվրոպայի դեմ որևէ ագրեսիվ ծրագիր չունի»։

«Ընդհանուր առմամբ, կրկնում եմ, գործընկերներ, զրույցն ընթացել է դրական նոտայով։ Նախագահները համաձայնել են կապի մեջ մնալ և անհրաժեշտության դեպքում օպերատիվ  կերպով կապ հաստատել  միմյանց հետ», -լրագրողներին ասել է Ուշակովը՝ Ռուսաստանի և ԱՄՆ նախագահների միջև զրույցից հետո։

Ամերիկյան կողմը դեռ հեռախոսազրույցի մասով տեղեկատվություն չի հաղորդել։

Թարգմանությունը՝ Էմմա   Չոբանյանի