Հանձնարարական եմ տվել. Երևանում մարզային տրանսպորտով չպետք է ուղևորափոխադրումներ իրականացվեն. Ավինյան․ ՏԵՍԱՆՅՈՒԹ

Երևան քաղաքում ներքաղաքային ուղևորափոխադրումներ պետք է իրականացնեն բացառապես համայնքային կառույցները, իսկ մարզային տրանսպորտը չպետք է սպասարկի ներքաղաքային ուղևորահոսքը և ծանրաբեռնի մայրաքաղաքի փողոցները։ Այս մասին Երևանի ավագանու նստաշրջանի նիստում հայտարարեց Երևանի քաղաքապետ Տիգրան Ավինյանը։

Քաղաքապետը շեշտեց, որ հարկավոր է հստակ տարանջատում մտցնել ներքաղաքային և միջմարզային երթուղիների միջև։

«Երևան քաղաքում ուղևորափոխադրումը պետք է իրականացնի «Երևանի ավտոբուս» ՓԲԸ-ն, «Երևանի էլեկտրատրանսպորտ» ՓԲԸ-ն, Մետրոպոլիտենը՝ այն կառույցները, որոնք լիազորված են և պարտավոր են դա իրականացնել։ Բոլոր մնացած տրանսպորտային միջոցները՝ լինեն մասնավոր կամ մարզային միկրոավտոբուսներ, թե ավտոբուսներ, իրավունք չունեն Երևանում կանգառից կանգառ կայանելու և մարդ տեղափոխելու»,- ընդգծեց նա։

Անդրադառնալով Ջրվեժի ուղղությամբ տրոլեյբուսային գծի երկարաձգման շուրջ առաջացած աղմուկին՝ քաղաքապետը նշեց. «Մի հատիկ տրոլեյբուսային գիծ մի քիչ բարձրացել է Ջրվեժ՝ «Զոնտիկների» մոտից մարդկանց է վերցնում, սաղ աշխարհով սիրենաները միացել են»։

Ավինյանի խոսքով՝ մայրաքաղաքի ծանրաբեռնվածությունը սրվում է նաև մարզային տրանսպորտի ու մեծաթիվ տաքսիների պատճառով, իսկ խնդիրները լուծելու համար պետք է իրականությունն ընդունել այնպես, ինչպես կա.

«Պիկ ժամերին Երևանում լինում է 2 միլիոնից ավելի մարդ, և փողոցները միայն երևանցիներով չեն ծանրաբեռնվում։ Մենք ուզում ենք էֆեկտիվ կազմակերպել տեղափոխումը մարզերից Երևան և Երևանի ներսում, բայց խնդիրները չենք կարող լուծել, եթե դրանք պարզապես «սիրուն փաթեթավորենք»։ Պետք է ասել այն, ինչ ունենք»,- նշեց Տիգրան Ավինյանը։

Մանրամասները՝ տեսանյութում։