Խլուրդներին գտե՞լ են, ժամանակը չի՞ լրացել. հարց` Փաշինյանին․ ՏԵՍԱՆՅՈՒԹ

Վարչապետ Նիկոլ Փաշինյանը լրագրողների հետ ճեպազրույցի ժամանակ անդրադարձավ Հարավկովկասյան երկաթուղու (ՀԿԵ) շուրջ տարիներ առաջ հնչեցված աղմկահարույց չարաշահումների գործի կարճման և իրավապահ համակարգում «խլուրդների» բացահայտման համար տրված ժամկետներին։

Factor TV-ի լրագրողը հիշեցրեց վարչապետի՝ Ազգային ժողովում արած վերջին հայտարարությունն այն մասին, որ երկաթուղին հանդիսանում է Հայաստանի սեփականությունը և պարզապես գտնվում է ռուսական կողմի կառավարման ներքո, ուստի հայկական կողմն այդ փաստի հետ որևէ խնդիր չունի։

Լրագրողը զուգահեռներ անցկացրեց 2018 թվականի հետ, երբ Նիկոլ Փաշինյանը հայտարարում էր Հարավկովկասյան երկաթուղում շուրջ 60 միլիոն դոլարի չարաշահումների մասին, ինչին ի պատասխան Մոսկվան սպառնացել էր վաղաժամկետ լուծարել կոնցեսիոն պայմանագիրը: Շուրջ երեք տարի տևած քննությունից հետո՝ 2021 թվականի մարտին, ՀՀ քննչական կոմիտեն կարճեց քրեական գործը։

Լրագրողի հարցին, թե արդյո՞ք այդ 60 միլիոն դոլարի չարաշահումները «ֆեյք» էին, թե՞ ռուսական կողմն ամբողջությամբ փոխհատուցել է պատճառված վնասը, վարչապետը հստակ պատասխան չտվեց. «Պիտի նայել կարճման հիմքերը: Կարծում եմ՝ ինչ-որ ֆինանսական ներդրումներ են եղել, և դա է եղել կարճման պատճառը, բայց ես հիմա վստահ չեմ, չեմ կարող հիշել»։

Անդրադառնալով լրագրողի մյուս հարցադրմանը, թե արդյո՞ք իրավապահներին տրված ժամանակը սպառվել է, արդյո՞ք համակարգում գտնվել են «խլուրդները», և կա՞ն արդյոք պաշտոնանկություններ, վարչապետը պատասխանեց․ «Ինչ վերաբերում է իմ տված ժամանակին՝ երբ որ կլինեն հետևանքները, համոզված եմ՝ դուք կտեսնեք և կլսեք դա: Քանի դեռ չի եղել, ուրեմն դեռ ժամանակ կա»։

Մանրամասները՝ տեսանյութում։

Եվգենյա Համբարձումյան