Քաղաքականություն
03.09.2026 | 15:35
Իրանի բանակը հինգշաբթի հայտարարել է, որ հարվածներ է հասցրել Արաբական Միացյալ Էմիրություններում և Քուվեյթում գտնվող ԱՄՆ ռազմաբազաներին՝ չնայած ԱՄՆ նախագահ Դոնալդ Թրամփի կողմից նոր հարվածներ հասցնելու սպառնալիքներին, գրում է France 24-ը։
«Այս առավոտ բանակը հրթիռներով և անօդաչու թռչող սարքերով հարվածել է Քուվեյթում գտնվող Ահմադ ալ-Ջաբեր ավիաբազայում ԱՄՆ բանակի արբանյակային կապի համակարգերին, տեխնիկայի պահեստներին և կործանիչների անգարներին», – պետական հեռուստատեսությամբ տարածված հայտարարության մեջ նշել է Իրանի բանակը։
Նշվում է, որ «ԱՄԷ-ում գտնվող Ալ-Մինհադ ավիաբազայում ԱՄՆ բանակի ուժերի և ռադարային համակարգերի տեղակայման վայրերը նույնպես ենթարկվել են բանակի հրթիռային և անօդաչու թռչող սարքերի հարձակմանը»։
Քուվեյթի բանակը ավելի վաղ հայտարարել էր, որ որսում և խոցում է Իրանից արձակված հրթիռներն ու անօդաչու թռչող սարքերը։
«Քուվեյթի հակաօդային պաշտպանության ուժերը ներկայում դիմակայում են թշնամական հրթիռային և անօդաչու թռչող սարքերի հարձակումներին՝ հետևելով Իրանի ագրեսիային»,- նշել էր բանակը X-ում։
Իրանի պետական հեռուստատեսությունը հաստատել էր, որ Թեհրանը հարվածներ է հասցնում Քուվեյթում գտնվող ԱՄՆ ռազմաբազաներին՝ «ի պատասխան ամերիկյան կողմից Իրանի ժողովրդի դեմ իրականացված հանցագործությունների»։ Քուվեյթի ԱԳՆ-ն դատապարտել է Իրանի կողմից իրականացված հրթիռային և անօդաչու թռչող սարքերի հարձակումները՝ դրանք որակելով որպես իր ինքնիշխանության «բացահայտ խախտում» և սպառնալիք երկրի անվտանգությանը և կայունությանը։ Նախարարության հաղորդմամբ՝ հարձակումների հետևանքով թիրախավորվել են մի շարք օբյեկտներ, այդ թվում՝ բնակելի համալիր, ինչը միջազգային իրավունքի խախտում է։
Այս վերջին հարձակումը տեղի է ունեցել այն բանից հետո, երբ ուղիղ ռազմական գործողությունների մեկամսյա դադարը խախտվել էր ԱՄՆ-ի կողմից Իրանի Լարաք կղզուն հասցված հարվածով։ Այդ հարվածին ի պատասխան՝ Իրանը Պարսից ծոցի ողջ տարածքում ուղիղ պատասխան հարվածների ալիք էր իրականացրել։ Փետրվարի 28-ին Իրանի դեմ ԱՄՆ-ի և Իսրայելի գործողությունների մեկնարկից ի վեր Քուվեյթը ամենահաճախ թիրախավորվող երկրներից մեկն է։
Թարգմանությունը՝ Էմմա Չոբանյանի
