Անգլիական «Մանչեսթեր Սիթին» ներկայացրել է նոր մրցաշրջանի համար նախատեսված երրորդ համազգեստը, որը ստեղծվել է արհեստական բանականության միջոցով ու երկրպագուների մասնակցությամբ, հաղորդում է ակումբի մամուլի ծառայությունը:
«Այս հավաքածուն ստեղծվել է Puma AI Creator-ի միջոցով, որն արհեստական բանականության գործիք է և գրավոր մուտքագրումները վայրկյանների ընթացքում վերածում է հավաքածուի դիզայնի։
2024 թվականի դեկտեմբերին թողարկված AI Creator-ը երկրպագուներին իրական հնարավորություն տվեց ազդելու ստեղծագործական գործընթացի վրա՝ հուշումների և ինտուիտիվ խմբագրման գործիքների միջոցով, առանց դիզայներական փորձի պահանջի։
Ավելի քան 200 երկրներից «Մանչեսթեր Սիթիի» երկրպագուներ ներկայացրել են երրորդ համազգեստի իրենց տեսլականը, որի արդյունքում ստեղծվել է ավելի քան 180,000 եզակի դիզայն։ Հարթակում 1.7 միլիոն քվեարկությունից հետո ամենատարածված համազգեստները ընդգրկվել են եզրափակիչ տասնյակում, որոնք 2025 թվականի հունվարին ներկայացվել են երկրպագուների քվեարկությանը:
Աշխարհի տարբեր ծայրերից երկրպագուների քվեարկությունից հետո հայտարարվել է հաղթողը՝ սպիտակ ֆոն, որը բաժանված էր կենտրոնական երկգույն շերտով, կեսը՝ երկնագույն, կեսը՝ մուգ կապույտ, որը ձգվում էր մարզաշապիկի երկայնքով՝ նուրբ գրադիենտային էֆեկտով, որը փոխվում է լուսավորությունից կախված։
Սա գուցե երրորդ հանդերձանքն է, բայց այն իր տեսակի մեջ առաջինն է՝ նախագծված մեզանից մեկի կողմից և ընտրված բոլորիս կողմից»,- նշված է ակումբի հայտարարության մեջ:
Դավիթ Եղիազարյան
