ՀՀ բոլոր քաղաքացիներին, անկախ իրենց սեռական կողմնորոշումից, պատրա՞ստ եք պաշտպանել․ հարց Գալստյանին․ ՏԵՍԱՆՅՈՒԹ

Ազգային ժողովում Մարդու իրավունքների պաշտպանության հանձնաժողովի նախագահի պաշտոնում Լիլիթ Գալստյանի թեկնածության քննարկման ժամանակ «Քաղաքացիական պայմանագիր» խմբակցության պատգամավոր Սոնա Ղազարյանը բարձրացրեց ընդդիմադիր պատգամավորի կողմից նախկինում հնչեցված ձևակերպումների և սեռական փոքրամասնությունների իրավունքների պաշտպանության հարցը։

Սոնա Ղազարյանը հիշեցրեց, որ Լիլիթ Գալստյանը և իր խմբակցությունը դեմ են արտահայտվել ընտանեկան բռնության մասին օրենքին՝ մտավախություն ունենալով, որ «զուգընկեր» տերմինը կարող է պաշտպանություն տարածել նույնասեռ զույգերի վրա։ 

«Ուզում եմ ճշտել՝ Դուք արդյոք պատրաստվո՞ւմ եք լինել Հայաստանի Հանրապետության բոլոր քաղաքացիների հանձնաժողովի նախագահ՝ իրենց սեռական պատկանելիության հիմքով խտրական վերաբերմունք չցուցաբերելով»,- հարցրեց Ղազարյանը։

Ի պատասխան՝ Լիլիթ Գալստյանն ընդգծեց իր նվիրվածությունը մարդու իրավունքներին՝ որպես օրինակ բերելով Սոնա Ղազարյանի սկեսրայրի ազատ արձակման հարցում իր միջնորդությունը։ 

«Հայաստանում պաշտպանության կարիք ունեն Հայաստանի Հանրապետության բոլոր քաղաքացիները՝ անկախ սեռից, ազգային պատկանելությունից, կրոնական և քաղաքական հայացքներից»,- հայտարարեց թեկնածուն։

Ղազարյանի մյուս հարցը վերաբերում էր վարչապետ Նիկոլ Փաշինյանի տիկնոջ՝ Աննա Հակոբյանի հասցեին Գալստյանի կողմից «զուգընկերուհի» բառի կիրառմանը։ Պատգամավորը դա որակեց որպես թիրախավորում և սոցիալական կարգավիճակի նսեմացում։

Գալստյանը հակադարձեց, որ տերմինն օգտագործել է զուտ իրավական տեսանկյունից. «Ընտանեկան օրենսգրքով ընտանիք է համարվում պետական գրանցման ակտերով վավերացված ընտանիքը։ Ես չէի կարող «ընտանիք» բառը գործածել այս պարագայում, և «զուգընկերուհին» ամենապատշաճ բառն է»։ 

Նա հավելեց, որ իր խոսքը ոչ թե անձնական էր, այլ քաղաքական կոնտեքստ ուներ։

Մանրամասները՝ տեսանյութում։

Եվգենյա Համբարձումյան