22.10.2026 | 20:56
Մակրոնը հայտարարել է, որ առաջիկա «ոչ լեգիտիմ» բողոքի ցույցերն արգելվելու են
Բելգիայի պատմության խոշորագույն անտառային հրդեհը շարժվում է Գերմանիայի ուղղությամբ
Քաղաքականություն
16.08.2026 | 14:06
Բելգիայի Hohes Venn բնական արգելոցում բռնկված լայնածավալ անտառային հրդեհի հետագա տարածման պատճառով Բելգիայի սահմանին մոտ գտնվող Հյուսիսային Ռեյն-Վեստֆալիայի Մոնշաու քաղաքում իրավիճակը կարող է վատթարանալ։ Կրակի ճակատը գտնվում է Գերմանիայի սահմանից մոտ 3 կմ հեռավորության վրա, օգոստոսի 16-ի՝ կիրակի լույս գիշերը հայտնել է քաղաքի վարչակազմը։ Ծխի «զգալի» տարածման վտանգի պատճառով երեք շրջանների բնակիչներին խստորեն խորհուրդ է տրվել լքել այդ տարածքները։
Հրդեհի հետագա տարածման դեպքում չի բացառվում ծխի խտացումն ու մրի տեղումները։ Պլատևեն, Լեյլոխ և Կալտերհերբերգ բնակավայրերի՝ Մեսվեգից արևմուտք գտնվող հատվածների բնակիչներին առողջության համար հնարավոր վտանգի պատճառով խստորեն խորհուրդ է տրվել մինչև առավոտ լքել տարածքը և ժամանակավորապես մնալ հարազատների կամ ընկերների մոտ։ Նրանց համար նախատեսվում է նաև ժամանակավոր կացության կենտրոն բացել։
Մոնշաուի հրշեջ ծառայությունը լիակատար պատրաստվածության վիճակում է։ Քաղաքային իշխանությունների տվյալներով՝ կանխարգելիչ կարգով նախապատրաստվում են հրդեհաշիջման միջոցառումներ, որպեսզի կրակի՝ Գերմանիայի տարածք անցնելու դեպքում հնարավոր լինի անմիջապես սկսել պայքարը հրդեհի դեմ։
Բելգիայի իշխանությունները կարգադրել են տարհանել Կալտերհերբերգից անմիջապես արևմուտք գտնվող Կյուխելշայդ բնակավայրը։
Գերմանիայի սահմանի մոտ՝ Hohes Venn արգելոցում բռնկված անտառային հրդեհը դարձել է Բելգիայի պատմության մեջ խոշորագույնը։ Հրդեհը սկսվել է օգոստոսի 14-ի՝ ուրբաթ օրվա կեսօրին և դրանից հետո արագ տարածվել։ Իշխանությունների տվյալներով՝ կրակն արդեն ոչնչացրել է ավելի քան 3000 հեկտար տարածք։
Բելգիական Belga լրատվական գործակալության տվյալներով՝ Սուրբրոդ և Բյուտգենբախ համայնքների շուրջ 600 բնակչի կոչ է արվել տարհանվել։
Անտառային հրդեհի դեմ պայքարելու համար Բելգիան գործարկել է ԵՄ քաղաքացիական պաշտպանության մեխանիզմը՝ Եվրամիության երկրներից օգնություն ստանալու նպատակով։
Հրդեհաշիջման աշխատանքներին արդեն մասնակցել է Նիդեռլանդներից ժամանած հրշեջ ուղղաթիռը։ Կիրակի օրվանից նախատեսվում էր աշխատանքներին ներգրավել ևս երկու ուղղաթիռ և շվեդական երկու հրշեջ ինքնաթիռ։
Միևնույն ժամանակ Գերմանիայի Այֆել տարածաշրջանի Հյուրտգենվալդ շրջանում իրավիճակը սկսել է բարելավվել։ Բնակավայրերից մեկի տարհանումից հետո շուրջ 1800 բնակիչ կարողացել է վերադառնալ տուն։
