16.08.2026 | 14:30
Վթարային ջրանջատում Երևանում
ՀԱՊԿ գլխավոր քարտուղարը խոսել է կազմակերպությանը Հայաստանի մասնակցության հեռանկարների մասին
Քաղաքականություն
16.08.2026 | 11:29
ՀԱՊԿ-ին Հայաստանի մասնակցության հեռանկարների վերաբերյալ որոշումը պետք է ընդունվի ողջամիտ ժամկետներում։ Այս մասին «ՌԻԱ Նովոստի»-ին հայտարարել է կազմակերպության գլխավոր քարտուղար Թաալաթբեկ Մասադիկովը։
«Ելնում ենք այն հանգամանքից, որ ՀԱՊԿ-ին Հայաստանի մասնակցության հեռանկարների վերաբերյալ որոշումը պետք է ընդունվի ողջամիտ ժամկետներում»,- «ՌԻԱ Նովոստի»-ին ասել է Մասադիկովը։
Ավելի վաղ ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը «ՌԻԱ Նովոստի»-ին հայտնել էր, որ ՀԱՊԿ մարմիններում Հայաստանին ձայնի իրավունքից զրկելու վերաբերյալ որոշման ընդունման համար անհրաժեշտ կլինի կոնսենսուս։ Նրա խոսքով՝ ՀԱՊԿ Հավաքական անվտանգության խորհրդի հերթական նստաշրջանը տեղի կունենա Մոսկվայում նոյեմբերի 11-ին, և պետությունների ղեկավարները, ամենայն հավանականությամբ, կքննարկեն այդ հարցը։
ՌԴ արտաքին գործերի նախարար Սերգեյ Լավրովը հունիսի 10-ին հայտարարել էր, որ ՀԱՊԿ անդամավճարները Հայաստանի կողմից չվճարելու պատճառով կազմակերպությունը կքննարկի կանոնադրության այն հոդվածի կիրառումը, որը կարգավորում է իրենց պարտավորությունները չկատարող անդամ պետությունների նկատմամբ գործողությունները։
Հայաստանը 2024 թվականին սառեցրել է իր մասնակցությունը ՀԱՊԿ-ին։ Վարչապետ Նիկոլ Փաշինյանն անդրադարձել է ՀԱՊԿ-ի շրջանակում Հայաստանի անդամավճարների չվճարման և դրա հնարավոր հետևանքների վերաբերյալ հայտարարություններին։
«ՀԱՊԿ-ի հետ կապված չեմ կարող մեկնաբանություն անել։ Ես գիտեմ, որ ՀԱՊԿ-ից հեռացման մեխանիզմ կա և գործում է։ Եթե անդամ երկրները որոշեն Հայաստանին հեռացնել, մենք ստիպված կլինենք այդ որոշումն ընդունել ի գիտություն։ Ուրիշ բան անելու չունենք»,- հունիսի 11-ին լրագրողների հետ ճեպազրույցում ասել էր Փաշինյանը։
Հունիսի 8-ին ՀՀ արտաքին գործերի նախարար Արարատ Միրզոյանը հայտարարել էր, որ Հայաստանը 2025 թվականին ՀԱՊԿ-ին անդամավճար չի վճարել՝ պարզաբանելով, որ Հայաստանը չի մասնակցել կազմակերպության գործունեությանը։Հայաստանը 2024 թվականի փետրվարից սառեցրել է մասնակցությունը Կավաքական անվտանգության պայմանագրի կազմակերպության աշխատանքներին։
Կազմակերպության անդամներն են Ռուսաստանը, Բելառուսը, Հայաստանը, Ղազախստանը, Ղրղզստանը և Տաջիկստանը։
