Հանրաքվե, իհարկե, կլինի, բայց այն բանից հետո, երբ ՀՀ-ն պաշտոնապես դիմի ԵՄ-ին անդամակցելու համար․ Փաշինյան․ ՏԵՍԱՆՅՈՒԹ

Հայաստանում Եվրոպական միությանն անդամակցության հարցով հանրաքվեի անցկացումը հնարավոր կլինի միայն այն բանից հետո, երբ Հայաստանի Հանրապետությունը պաշտոնապես դիմի ԵՄ-ին։ Այս մասին Եվրասիական միջկառավարական խորհրդի ընդլայնված կազմով նիստից հետո լրագրողների հետ զրույցում հայտարարել է ՀՀ վարչապետ Նիկոլ Փաշինյանը։

Անդրադառնալով ԵՄ անդամակցության հանրաքվեի հնարավորությանը՝ Փաշինյանն ընդգծել է. «Հանրաքվե, իհարկե, կլինի, բայց այն բանից հետո, երբ Հայաստանը պաշտոնապես դիմի Եվրոպական միությանը՝ Եվրոպական միությանն անդամակցելու հարցով, և դրա շուրջ պետք է ինստիտուցիոնալ աշխատանք տանել։ Այսօր հանրաքվեի անցկացումն անհնար է, որովհետև չկա այդ հանրաքվեի առարկան»։

Վարչապետի խոսքով՝ եթե այսօր հանրաքվե անցկացվի, քաղաքացիները հարցնելու են ԵՄ անդամակցության հստակ հեռանկարների և ճանապարհային քարտեզի մասին, որոնց պատասխաններն այս պահին դեռ առկա չեն։

Նիկոլ Փաշինյանը շեշտել է, որ Հայաստանի քաղաքականությունն ուղղված է արտաքին հարաբերությունների դիվերսիֆիկացմանը և այլընտրանքների ստեղծմանը, ինչը ցանկացած ինքնիշխան երկրի լեգիտիմ իրավունքն է։

Անդրադառնալով հայկական ապրանքների նկատմամբ Ռուսաստանի կողմից կիրառվող սահմանափակումներին՝ Փաշինյանը նկատել է, որ դրանք բացասական ընկալում են առաջացնում ԵՏՄ-ի նկատմամբ. «Այն, ինչ հիմա կատարվում է հայկական ապրանքների հետ կապված, խնդիր է Հայաստանի համար, բայց է՛լ ավելի մեծ խնդիր է ԵՏՄ-ի համար, որովհետև պրակտիկայում ստացվում է, որ ԵՏՄ-ն չի աշխատում։ Եթե սկզբունքները չեն աշխատում, նշանակում է՝ չի աշխատում ԵՏՄ-ն»։

Վարչապետը հավելել է նաև, որ ԵՏՄ որոշ գործընկերների հայտարարությունները, թե «Հայաստանին ոչ մի տեղ չեն սպասում», Հայաստանը դրական է ընդունել և ակտիվորեն աշխատում է հակառակն ապացուցելու ուղղությամբ։

Մանրամասները՝ տեսանյութում։

Անի Թամրազյան