26.09.2026 | 20:38
Քաղաքացին ընկել է ջրհորը. նա հոսպիտալացվել է
Թող գան ու փնտրեն․ Հաջիևը՝ Ադրբեջանում Իսրայելի բազաների մասին
Քաղաքականություն
05.08.2026 | 16:15
Ադրբեջանն ու Թուրքիան համաձայնեցնում են իրենց դիրքորոշումները տարածաշրջանային հիմնական հարցերի շուրջ։ Այս մասին Türkiye թերթին տված հարցազրույցում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը, գրում են ադրբեջանական լրատվամիջոցները։
Նա նշել է, թե իսրայելա-ադրբեջանական հարաբերությունները ոչ մի դեպքում չեն կարող այնպիսի բնույթ ստանալ, որը կվնասի Թուրքիայի շահերին։ Հաջիևը հավելել է՝ երկու երկրների հարաբերությունները խաթարել ցանկացող ուժերն ամեն ինչ անում են՝ Պաղեստինի հարցի վերաբերյալ ապատեղեկատվություն տարածելու համար: Նա նշել է, թե Բաքուն օգնություն է ցուցաբերում Գազային, ներկայացուցչություն ունի Ռամալլահում, Պաղեստինին աջակցելու մյուս սոցիալական նախաձեռնությունները նույնպես շարունակվում են։
«Մենք երբեք չենք լինի որևէ նախագծի մաս, որը հակասում է Թուրքիայի շահերին: Ադրբեջանում և Բաքվում «իսրայելական բազաների առկայության» մասին սև քարոզչությունը, որը, իբր, Իսրայելի համար «փրկարար օղակ» է, Թուրքիայի և Ադրբեջանի թշնամիների կողմից հորինված սուտ է: Մենք մարտահրավեր ենք նետում նրանց: Թող գան ու միասին անցնենք ամեն մետրը՝ կա՞ այստեղ ինչ-որ բան, որը պատկանում է Իսրայելին: Մենք այս պնդումների հեղինակներին կտանք իրավունք՝ ստուգում անցկացնել ցանկացած վայրում»,- ասել է Հաջիևը։
Ըստ պնդմամբ՝ Բաքուն չի կարող անտարբեր մնալ Գազայի և պաղեստինցի ժողովրդի տառապանքների նկատմամբ։ Միաժամանակ, Հաջիևն ասել է, որ պաղեստինա-իսրայելական հակամարտության երկու պետությունների լուծումը մնում է սկզբունքային հարց Բաքվի համար։
«Ավելին, մենք նախաձեռնություն ենք ցուցաբերում և իրականացնում ենք կանխարգելիչ առաքելություն՝ Իսրայելի և Թուրքիայի միջև ճգնաժամերը կանխելու համար։ Հենց այս համատեքստում էր կարևոր Իսրայելի և Սիրիայի ղեկավարների միջև Ադրբեջանում կայացած հանդիպումը»,- հայտարարել է Հաջիևը։
Թարգմանությունը՝ Էմմա Չոբանյանի
