Եվրոպական միության մշտական ներկայացուցիչների կոմիտեն (COREPER II) ամփոփել է Իսպանիայի էքսկլավ Սեուտայի սահմանային ճգնաժամի արդյունքները՝ հայտարարելով, որ իրավիճակն արդեն «արագորեն վերահսկողության տակ է առնվել»։
Քիչ առաջ ավարտված հանդիպումից հետո ԵՄ դիվանագետներից մեկը Factor TV-ին փոխանցել է, որ Իսպանիայի իշխանություններից ու ԵՄ գործակալություններից ստացված վերջին տվյալները ցույց են տալիս, որ սահմանն անօրինական հատած գրեթե բոլոր անձինք արդեն վերադարձվել են:
Պաշտոնական տվյալներով՝ դեպի եվրոպական մայրցամաք կամ անդամ այլ երկրներ հետագա տեղաշարժեր չեն գրանցվել։
Հիշեցնենք, որ նախորդ շաբաթ շուրջ 60 հազար մարդ Մարոկկոյից փորձել էին թե՛ ցամաքային, թե՛ ծովային ճանապարհներով ներթափանցել Սեուտա։
Այնուամենայնիվ, իրավիճակը ողբերգական է մարդկային կորուստների տեսանկյունից։ Ըստ դիվանագետի տրամադրած տեղեկատվության՝ սահմանը հատելու փորձի ժամանակ զոհվածների թիվը գերազանցել է 70-ը։
Այսօր կայացած նիստի ընթացքում ԵՄ անդամ երկրներն իրենց «ամուր համերաշխությունն» են հայտնել Իսպանիային և բարձր գնահատել իսպանական կողմի օպերատիվ արձագանքը։
COREPER II-ը նաև նախապատրաստել է ԵՄ ներքին գործերի նախարարների վաղվա արտակարգ տեսակոնֆերանսը։ Վաղը՝ օգոստոսի 4-ին, Բրյուսելի ժամանակով ժամը 10:00-ին կայանալիք հանդիպումը կնախագահի Իռլանդիայի արդարադատության, ներքին գործերի և միգրացիայի հարցերի նախարար Ջիմ Օ’Քալահանը։
Նախարարական քննարկմանը կմասնակցեն նաև Շենգենյան գոտու ասոցացված երկրների, Եվրոպական արտաքին գործողությունների ծառայության (EEAS), Frontex-ի և Եվրոպոլի ներկայացուցիչները։
Ըստ դիվանագետի՝ վաղվա օրակարգի առանցքում լինելու են ԵՄ արտաքին սահմանների պաշտպանությունը և երրորդ երկրների հետ դիվանագիտական համագործակցության հետագա համակարգումը։
Կարինե Ասատրյան
Բրյուսել
