«Ուկրաինան ՆԱՏՕ-ում արտակարգ պաշտպանական կարողությունների աղբյուր է»․ Զելենսկին՝ Անկարայում ՆԱՏՕ-ի գագաթնաժողովին

Ուկրաինայի նախագահ Վլադիմիր Զելենսկին ելույթ է ունեցել Անկարայում ՆԱՏՕ-ի գագաթնաժողովի շրջանակում Պաշտպանական արդյունաբերության ֆորումում։ Նա ներկայացրել է Ուկրաինայի հաջողությունները պատերազմի ժամանակ, առաջին հերթին՝ անօդաչու թռչող սարքերի արդյունաբերության ոլորտում, գրում է BBC-ի ռուսական ծառայությունը։

Զելենսկին պնդել է, որ ուկրաինական ՀՕՊ համակարգերը խոցում են «Շահեդ» անօդաչու թռչող սարքերի ավելի քան 90%-ը, և սա աշխարհում լավագույն արդյունքն է։

«Դուք իսկապե՞ս կարծում եք, որ նման պաշտպանական կարողություններ ունեցող երկիրը պետք է լինի դաշինքից դուրս։ Ուկրաինան ՆԱՏՕ-ում արտակարգ պաշտպանական կարողությունների աղբյուր է»,- հռետորական հարց է ուղղել Զելենսկին քննարկման ներկաներին, որոնց թվում են եղել Եվրահանձնաժողովի նախագահ Ուրսուլա ֆոն դեր Լեյենը և ՆԱՏՕ-ի գլխավոր քարտուղար Մարկ Ռյուտեն։

Նա նաև անդրադարձել է «երկարաժամկետ պատժամիջոցների» թեմային՝ Ռուսաստանի վրա հարվածներին, որոնք հասել են  մինչև Օմսկ։ Սիբիրում նավթավերամշակման գործարանի վրա հարձակումը բացառություն չէր, այլ իրականություն, ասել է Զելենսկին՝ հավելելով, որ Ռուսաստանում չկա որևէ խոշոր նավթավերամշակման գործարան, որն Ուկրաինայի զինված ուժերի հարձակմանը չի ենթարկվել։

Զելենսկին հիշատակել է անօդաչու թռչող սարքերի մասին համաձայնագիրը՝ Drone deal-ը, որի համաձայն՝ Ուկրաինայի գործընկերները (ԵՄ և ՆԱՏՕ-ի երկրները, ինչպես նաև Ադրբեջանը և Պարսից ծոցի երկրները) կարող են ստանալ ուկրաինական անօդաչու թռչող սարքեր։

Միաժամանակ, Զելենսկին ասել է, որ Ռուսաստանը դեռևս ունի մեկ հիմնական առավելություն՝ բալիստիկան: Նա հավելել է, որ Եվրոպան պետք է կառուցի ամուր պաշտպանություն ռուսական հրթիռներից: Եվրոպան կարիք ունի իր սեփական ՀՕՊ համակարգերի, որոնք կարող են զանգվածաբար արտադրվել, և որոնք կարող են պաշտպանություն ապահովել ռուսական հարվածներից: Եվրոպան պետք է հնարավորինս շուտ մշակի իր սեփական ՀՕՊ համակարգերը՝ «հենց այսօր», և ոչ թե ապագայում, ընդգծել է Ուկրաինայի նախագահը։

«Մինչ այս պատերազմը շարունակվում է, խնդրում ենք օգնել մեզ հակաօդային պաշտպանության հրթիռներով։ Սա մեր գերակա խնդիրն է։ Մենք կարող ենք մնացած ամեն ինչ անել ինքներս»,- ասել է նա։