Պարոն Քոչարյանի պատճառով տապալվեց նախագիծը. Հայկ Սարգսյան․ ՏԵՍԱՆՅՈՒԹ

«Մենք ունենք զորակոչի հետ կապված լրջագույն խնդիր»,- այս մասին Ազգային ժողովի պաշտպանության և անվտանգության հարցերի հանձնաժողովի արտահերթ նիստի ժամանակ նշեց իշխանական պատգամավոր Հայկ Սարգսյանը։

«Մենք զորակոչ ենք կորցնում մի քանի պատճառով։ Առաջինը՝ առողջական կեղծ թղթերով ազատվողներն են։ Մենք  տարեկան կտրվածքով ունենք դեպքեր, երբ հազարավոր տղաներ առողջական թղթերով ազատվում են, ու, մեծ հավանականությամբ, շատերը կեղծ։ Այսինքն՝ զորակոչի մոտ 69%-ը (22 թվականի դրությամբ, հիմա թիվը դարձել է 65%) ազատվում է, որոնց գերակշիռ մասը՝ առողջական խնդիրներով պայմանավորված։ Այս օրենքը գալու է դրա դեմն առնելու, այսինքն՝ կանխարգելիչ դեր է ունենալու»,- նշեց Սարգսյանը։

Նա հորդորեց Վահագն Ալեքսանյանին, որպեսզի «ծառայությունից խուսափելու համար քաղաքացիությունից հրաժարվողների դեմն առնեն։»

«2024 թվականին քաղաքացիությունից հրաժարվել է 1900 տղա և 60 աղջիկ։ Փաստացի ֆիքսվում է, որ մեծամասնությունը բանակից խուսափելու համար է արել։ Իմ օրենքը, երբ պարոն Անդրանիկ Քոչարյանի պատճառով մերժվեց, դրանից հետո տեմպը 30-40%-ով աճել է, ու 2025 թվականին քաղաքացիությունից հրաժարվել է 2800 տղա։ Մենք մեծ ռեսուրս ենք կորցրել այս նախագծի տապալմամբ՝ պարոն Քոչարյանի պատճառով կամ շնորհիվ։ Սրանով մենք ոչ միայն զինվոր ենք կորցրել, այլև լուրջ ֆինանսական միջոցներ, որովհետև այդ պակասը լրացրել ենք պայմանագրային զինծառայողներով, ինչը մեծ ֆինանսական բեռ է»,-նշեց նա։

Մանրամասները՝ տեսանյութում։