Իրանն առաջնահերթություն է տալիս ԱՄՆ-ի հետ դիվանագիտությանը, բայց շարունակում է պատրաստ լինել պատերազմի․ Ղալիբաֆ

Իրանի գլխավոր բանակցող, խորհրդարանի նախագահ Մոհամմադ Բաղեր Ղալիբաֆը հայտարարել է, որ Իրանն առաջնահերթություն է տալիս Միացյալ Նահանգների հետ դիվանագիտությանը, բայց շարունակում է պատրաստ լինել պատերազմին։

«Մենք ձգտում ենք երկխոսության, բայց եթե երկխոսությունը չկայանա, մենք նույնպես պատրաստ ենք պատերազմի և համապատասխան արձագանք կտանք»,- ասել է Ղալիբաֆը պետական ​​հեռուստատեսությանը տված հարցազրույցում՝ մինչ  իրանական և ամերիկյան պատվիրակությունները պետք է առանձին քննարկումներ անցկացնեին Դոհայում։

Ըստ նրա՝ Իրանի ներկայիս հանդիպումները նպատակ ունեն կատարել փոխըմբռնման հուշագրի պարտավորությունները, և որ Իրանը չի սկսի հետագա բանակցություններ, քանի դեռ չեն կատարվել Իրանի և Միացյալ Նահանգների միջև ստորագրված փոխըմբռնման հուշագրի պայմանները։ Ղալիբաֆը նշել է, որ հուշագրի առաջին կետում հստակորեն նշվում է՝ Լիբանանի տարածքային ինքնիշխանությունը, որը հիմնված է երկրի պաշտոնական և ճանաչված աշխարհագրական քարտեզի վրա, պետք է մնա որպես հիմնարար կարգավիճակ։

Ղալիբաֆը հավելել է, որ Իրանն Օմանի հետ միասին Հորմուզի նեղուցի նկատմամբ ինքնիշխանության իրավունք ունի և երբեք չի զիջի իր իրավունքները ջրային ուղիների նկատմամբ։ Նա շեշտել է՝ նեղուցով անցումն անվճար է միայն 60-օրյա ժամկետով, ինչպես նշված է փոխըմբռնման հուշագրում։

Իրանցի պաշտոնյան նաև ասել է, որ Իրանը չի կարողացել նավթ արտահանել ԱՄՆ-ի կողմից իր նավահանգիստների շրջափակման ընթացքում՝ նշելով, որ այդ ժամանակվանից ի վեր արտահանումը կտրուկ աճել է։

«Շրջափակման վերացման օրվանից մինչև այսօր մենք արտահանել ենք ավելի քան 40 միլիոն բարել նավթ։ Ի տարբերություն դրա՝ նախորդ գրեթե 60 օրվա ընթացքում մենք իսկապես չէինք կարող արտահանել նույնիսկ մեկ բարել նավթ»,- ասել է նա։

Նշենք, որ այսօր Դոհայում տեղի են ունենալու նաև Իրանի ու Կատարի բանակցությունները։ Կողմերը քննարկելու են Թեհրանի և Վաշինգտոնի միջև կնքված համաձայնագրի իրականացումը, ինչպես նաև նրա սառեցված ակտիվները։

Թարգմանությունը՝ Էմմա Չոբանյանի