Վազգեն Սաղաթելյանը ներողություն կխնդրի Ալեն Սիմոնյանից

Վազգեն Սաղաթելյանը ներողություն կխնդրի Ալեն Սիմոնյանից։ Factor TV-ն տեղեկացավ, որ Երևանի քաղաքացիական դատարանը պարտավորեցրել է Սաղաթելյանին հրապարակայնորեն՝ առնվազն հինգ աշխատանքային օր ժամկետով «Ֆեյսբուք» սոցիալական ցանցի իր անձնական էջում՝ բոլորի համար հասանելի և տեսանելի եղանակով, հրապարակել հետևյալ բովանդակությամբ հայտարարությունը. «Ես՝ Վազգեն Արմենի Սաղաթելյանս, ներողություն եմ խնդրում Ալեն Սիմոնյանից, քանի որ 09.11․2025թ. www.youtube.com կայքով ուղիղ եթեր հեռարձակվող «LIVE. 3-րդ նախագահի հետ մեր թողարկման, դրա արձագանքների և հիստերիկ նոպաների մասին «Իմնեմնիմի #223» վերնագրով փոդքասթի ժամանակ վիրավորական բնույթի արտահայտություն եմ օգտագործել՝ ուղղված Ալեն Ռոբերտի Սիմոնյանին»:

Հիշեցնենք՝ նոյեմբերի 12-ին ՀՀ ԱԺ նախագահ Ալեն Սիմոնյանը հայց էր ներկայացրել ընդդեմ Վազգեն Սաղաթելյանի։ Սիմոնյանը պահանջել էր հրապարակային ներողություն և ֆինանսական փոխհատուցում վիրավորական հրապարակումների համար։ Վազգեն Սաղաթելյանից հօգուտ Ալեն Սիմոնյանի կբռնագանձվի 300,000 դրամ, թեև հայցադիմումում Սիմոնյանը պահանջել էր 1 000 000 դրամ՝ որպես վիրավորանքի համար փոխհատուցում։

Հիշեցնենք, որ 2025 թվականի նոյեմբերի 7-ին Նարեկ Սամսոնյանն ու Վազգեն Սաղաթելյանը «Իմնեմնիմի» փոդքասթի շրջանակներում շուրջ 7 ժամ հարցազրույց էին վարել ՀՀ երրորդ նախագահ Սերժ Սարգսյանի հետ։ Հենց դրա ժամանակ հնչած արտահայտություններն էլ առիթ էին դարձել հայց ներկայացնելու համար։

Արփի Հակոբյան