Դավիթ Համբարձումյանի գործը ուղարկվեց նոր քննության․ նա ազատ արձակվեց դատական նիստերի դահլիճից․ ՏԵՍԱՆՅՈՒԹ

Մասիսի նախկին համայնքապետ Դավիթ Համբարձումյանի և նրա եղբոր՝ Գոռ Համբարձումյանի վերաբերյալ առաջին ատյանի ընդհանուր իրավասության դատարանի դատավճիռը մասնակի բեկանվեց։ Վերաքննիչ քրեական դատարանը որոշեց այդ մասով գործը կրկին փոխանցել առաջին ատյանի դատարան՝ նոր քննության։

Վերաքննիչ քրեական դատարանի որոշմամբ՝ Գոռ Համբարձումյանի նկատմամբ կիրառած 2 միլիոն դրամի չափով գրավ խափանման միջոցը թողնվեց անփոփոխ։ Դավիթ Համբարձումյանի նկատմամբ կիրառված տնային կալանքը փոխարինվեց վարչական հսկողությամբ։ Վերջինս ազատ արձակվեց դատական նիստերի դահլիճից։ Նրան նկատմամբ կիրառված 5 միլիոն դրամի չափով գրավ խափանման միջոցը և բացակայելու արգելքը թողնվեց անփոփոխ։

Ավելի քան 6 տարի քննությունից հետո 2025-ի հոկտեմբերին առաջին ատյանի դատարանը որոշել էր գործով անցնող մեղադրյալների մի մասին՝ Արմեն Մամուլյանին, Կարեն  Օհանյանին, Արմենակ Հակոբյանին, Գոռ Խաչատրյանին անմեղ ճանաչել իրենց վերագրվող զանգվածային անկարգությունների հոդվածով՝ մեղսագրվող արարքը նրանց  կողմից կատարված չլինելու պատճառաբանությամբ։

Դավիթ Համբարձումյանի եղբայրը՝ Գոռ Համբարձումյանն ու մեկ այլ մեղադրյալ՝ Մարատ Պողոսյանը, մեղավոր էին ճանաչվել իրենց վերագրվող խուլիգանության հոդվածով, սակայն նրանց նկատմամբ պատիժ չէր նշանակվել՝ քրեական պատասխանատվության  ենթարկելու վաղեմության ժամկետներն անցած լինելու հիմքով, իսկ Դավիթ Համբարձումյանը մեղավոր էր ճանաչվել և դատապարտվել 6 տարի 3 ամիս ժամկետով ազատազրկման։

Եվգենյա Համբարձումյան