05.09.2026 | 22:55
«Ինտերը» 0:2-ից հետո կամային հաղթանակ է տարել «Նապոլիի» նկատմամբ. ՏԵՍԱՆՅՈՒԹ
Ավելի քան 700 մլն դոլարի գործարք․ ԱՄՆ-ը Թուրքիային ինքնաթիռների շարժիչներ կմատակարարի իր առաջին տեղական կործանիչի համար՝ չնայած Կոնգրեսի առարկություններին
Քաղաքականություն
25.06.2026 | 21:36
ԱՄՆ նախագահ Դոնալդ Թրամփի վարչակազմը մտադիր է հաստատել Թուրքիային տասնյակ ռեակտիվ շարժիչների վաճառքը՝ հարյուր միլիոնավոր դոլար արժողությամբ, չնայած Կոնգրեսի անդամների մի մասի առարկություններին։ Այս մասին հաղորդում է Reuters-ը՝ վկայակոչելով թեմային ծանոթ չորս աղբյուրների։ Գործարքը ժեստ է Անկարային՝ հաջորդ ամիս Թուրքիայի մայրաքաղաքում կայանալիք ՆԱՏՕ-ի գագաթնաժողովից առաջ, գրում է The Insider-ը։
Նշվում է, որ General Electric-ի շարժիչները նախատեսված են Թուրքիայի առաջին տեղական արտադրության կործանիչի՝ KAAN-ի համար, որի մշակումը մեկնարկել է 2016 թվականին՝ Անկարայի պաշտպանական ինքնավարությունն ամրապնդելու ջանքերի շրջանակում:
Աղբյուրներից մեկի համաձայն՝ փաթեթը կարժենա ավելի քան 700 միլիոն դոլար։ Չնայած Վաշինգտոնի և Անկարայի հարաբերությունները Թրամփի օրոք, ընդհանուր առմամբ, մնում են ջերմ, դրանք խաթարված են Թուրքիային F-35 կործանիչների ծրագրից բացառելու շուրջ երկարատև վեճով և երկրի կողմից ռուսական C-400 համակարգերի ձեռքբերումից հետո կիրառված պատժամիջոցներով, որոնք ԱՄՆ-ը համարում է իր անվտանգությանը սպառնալիք:
Ավելի վաղ F-35-ների և Անկարայի գագաթնաժողովի ծրագրերի մասին հարցին Թրամփը պատասխանել էր․ «Ես, հավանաբար, կանեմ մի բան, որը նրանց շատ կուրախացնի»։
Ներկայացուցիչների պալատի արտաքին հարաբերությունների հանձնաժողովի դեմոկրատ անդադ Գրեգորի Միքսը ոչ պաշտոնական քննարկման ժամանակ դեմ է արտահայտվել գործարքին։ Չնայած նրա առարկություններին՝ վաճառքի վերաբերյալ որոշումը, ինչպես սպասվում է, կավարտվի առաջիկա օրերին, որից հետո Պետքարտուղարությունը պաշտոնական ծանուցում կուղարկի Կոնգրեսին, քանի որ Կոնգրեսի առարկությունները պարտադիր բնույթ չեն կրում։
ԱՄՆ փոխնախագահ Ջեյ Դի Վենսը հայտարարել է, որ զուգահեռ վերանայում է ընթանում՝ ապահովելու համար, որ Թուրքիան համապատասխանի ԱՄՆ-ի իրավական պահանջներին՝ F-35-ները ստանալու համար։
Ավելի վաղ Թուրքիայում ԱՄՆ դեսպան Թոմ Բարաքը հայտարարել էր, որ Անկարան պատրաստվում է հրաժարվել ռուսական C-400-ներից՝ F-35-ների գնման համար ճանապարհ հարթելու նպատակով, և որ այս հարցերը կարող են լուծվել «հաջորդ չորսից վեց ամիսների ընթացքում»։
Թարգմանությունը՝ Էմմա Չոբանյանի
