Ուրսուլա ֆոն դեր Լեյենի նկատմամբ հետաքննություն է սկսվել Վլադիմիր Զելենսկիի ու եվրոպացի առաջնորդների հետ փակ չաթի պատճառով

ԵՄ մարդու իրավունքների հանձնակատար Թերեզա Անինյոն հետաքննություն է սկսել Եվրոպական հանձնաժողովի նախագահ Ուրսուլա ֆոն դեր Լեյենի նկատմամբ։ Berliner Zeitung-ի փոխանցմամբ՝ հետաքննության պատճառ է դարձել այն, որ Եվրոպական հանձնաժողովը մերժել է հասանելիություն տրամադրել Ուկրաինայի նախագահ Վլադիմիր Զելենսկիի ու եվրոպացի այլ առաջնորդների մասնակցությամբ փակ չաթում անձնական զրույցներին, գրում է Current time-ը։

Խոսքը չաթի մասին է, որում ներառված են նաև Գերմանիայի կանցլեր Ֆրիդրիխ Մերցը, Ֆրանսիայի նախագահ Էմանուել Մակրոնը, Իտալիայի վարչապետ Ջորջիա Մելոնին և Մեծ Բրիտանիայի վարչապետ Քիր Սթարմերը։ Հետաքննությունը վերաբերվում ոչ թե նամակագրության բովանդակությանը, այլ Եվրահանձնաժողովի կողմից թափանցիկության կանոնների հնարավոր խախտմանը, որը հրաժարվել է բացահայտել հաղորդագրությունները։

Չաթի գոյության մասին հայտնի էր դարձել հունվարին։ Դրանից հետո հոլանդական Follow the Money հետաքննական  լրատվականը դիմել էր նամակագրությանը մուտքի հարցով, սակայն մերժվել էր։ Եվրոպական հանձնաժողովը հայտարարել էր, որ նյութերի հրապարակումը կարող է վնասել ԵՄ-ի հարաբերություններին երրորդ երկրների հետ։

Ըստ լրատվամիջոցների՝ նամակագրության մեջ, ի թիվս այլ բաների, քննարկվել են եվրոպացի առաջնորդների և ԱՄՆ նախագահ Դոնալդ Թրամփի միջև փոխազդեցությունները։ Հետաքննությունը կտևի մի քանի ամիս։ Հուլիսի կեսերին Եվրահանձնաժողովի ներկայացուցիչները նախատեսում են հանդիպել Եվրոպական օմբուդսմենի աշխատակազմի հետ՝ գործի հանգամանքները քննարկելու համար։

Թարգմանությունը՝ Էմմա Չոբանյանի