12.10.2026 | 22:10
ԵՄ-ն հստակեցրել է իր դիրքորոշումը երևանյան COP17-ի համար
Ադրբեջանը պարտավոր է Կարեն Ղազարյանին վերադարձնել. Նիկոլ Փաշինյան. ՏԵՍԱՆՅՈՒԹ
Քաղաքականություն
28.11.2018 | 11:49
Ադրբեջանում գերության մեջ գտնվող Կարեն Ղազարյանի խնդիրը պարզ խնդիր չէ: Այս մասին այսօր Նոյեմբերյան քաղաքում բնակիչների հետ հանդիպմանն ասաց ՀՀ վարչապետի պաշտոնակատար Նիկոլ Փաշինյանը՝ նկատելով, որ հասկանում է, թե որքան են Նոյեմբերյանում այդ հարցը կարևորում:
Հիշեցնենք՝ Տավուշի մարզի Բերդավան գյուղի բնակիչ 34-ամյա Կարեն Ղազարյանն այս տարվա հուլիսի 15-ին հայտնվել էր Ադրբեջանի տարածքում: Ադրբեջանական կողմը տեղեկություն էր տարածել «սահմանին Հայաստանի ԶՈՒ հետախուզադիվերսիոն խմբի հարձակման կանխման», ինչպես նաև 1984 թվականի ծնված հայ զինծառայող Կարեն Ղազարյանի գերեվարման մասին: Հայաստանի պաշտպանության նախարարությունից հայտարարել էին, որ Կարեն Ղազարյանը չի ծառայում և երբեք չի ծառայել Հայաստանի զինված ուժերում: Ադրբեջանի իշխանությունները, սակայն, Կարեն Ղազարյանին դիվերսանտ են հայտարարել ու դատել:
«Գիտեք, որ Ադրբեջանը կիսապաշտոնական առաջարկ է արել, ասել է հայկական կողմում կա երեք ադրբեջանցի և Ադրբեջանում կա երեք հայ, առաջարկել են բոլորին բոլորի հետ փոխանակել: Թվում է, թե շատ պարզ իրավիճակ է, մարդասիրական առաջարկ և ինչո՞ւ պետք է մենք հրաժարվենք այդ առաջարկից: Իրականում ամեն ինչ այդքան էլ պարզ չի, որովհետև Արցախի Հանրապետությունում Ադրբեջանի երկու քաղաքացի դատապարտված են մեկը՝ քսան տարով, մյուսը՝ ցմահ. նրանք սպանել են ԱՀ երկու քաղաքացու»,- ասաց Նիկոլ Փաշինյանը հարց հնչեցնելով՝ սպանված քաղաքացիների ընտանիքները կհամաձայնե՞ն, որ ոճրագործներին Արցախի Հանրապետությունը վերադարձնի Ադրբեջանին:
Մանրամասները՝ տեսանյութում:
