Հայտնի են հայկական ակումբների հավանական մրցակիցները եվրագավաթներում․ վիճակահանությունն այսօր է

ՈՒԵՖԱ-ի գրասենյակում հունիսի 16-ին կկայանան եվրագավաթների որակավորման առաջին փուլի վիճակահանությունները։

Հայաստանի նորընծա չեմպիոն «Արարատ-Արմենիան» պայքարը սկսելու է Չեմպիոնների լիգայի որակավորման առաջին փուլից։ Երևանյան ակումբի հավանական մրցակիցներն են «Շեմրոք Ռովերսը» (Իռլանդիա), «Կուպսը» (Ֆինլանդիա), «Լինքոլն Ռեդ Իմփսը» (Ջիբրալթար), «Ռիգան» (Լատվիա), «Ֆլորան» (Էստոնիա), «Լարնեն» (Հյուսիսային Իռլանդիա) և «Նյու Սեյնթսը» (Ուելս)։

Չեմպիոնների լիգայի որակավորման առաջին փուլի վիճակահանությունը կմեկնարկի Երևանի ժամանակով 18։00-ին։ Այդ փուլի առաջին հանդիպումները նախատեսված են հուլիսի 7-ին ու 8-ին, պատասխան խաղերը՝ մեկ շաբաթ անց։

Կոնֆերենցիաների լիգայի որակավորման առաջին փուլում Հայաստանն ունի երկու ներկայացուցիչ՝ «Փյունիկը» և «Ալաշկերտը»։

«Փյունիկի» հավանական մրցակիցներն են «Սիլեկսը» (Հյուսիսային Մակեդոնիա), «Դինամո Սիթին» (Ալբանիա), «Վիրտուսը» (Սան Մարինո), «Մորնար» (Չեռնոգորիա) և «Մարսաշլոկը» (Մալթա):

«Ալաշկերտի» հավանական մրցակիցներն են «Տորպեդո Քութայիսին» (Վրաստան), «Վելեժը» (Բոսնիա և Հերցեգովինա), «Ելիմայ Սեմեյը» (Ղազախստան), «Պետրովացը» (Չեռնոգորիա) և «Էլբասանին» (Ալբանիա)։

Կոնֆերենցիաների լիգայի որակավորման առաջին փուլում վիճակահանությունը կմեկնարկի Երևանի ժամանակով 20։00-ին։ Այդ փուլի առաջին խաղերը կկայանան հուլիսի 9-ին, պատասխան հանդիպումները՝ մեկ շաբաթ անց։

Կոնֆերենցիաների լիգային մասնակցելու է նաև Հայաստանի փոխչեմպիոն ու գավաթակիր «Նոան», որը պայքարը սկսելու է որակավորման երկրորդ փուլից։ Այդ փուլի վիճակահանությունը կկայանա հունիսի 17-ին։