Քաղաքականություն
27.11.2018 | 23:02
Ազգային ժողովի արտահերթ ընտրութուններին մասնակցող քաղաքական ուժերը Կենտրոնական ընտրական հանձնաժողովին են ներկայացրել իրենց եկամտի հայտարարագրերը: Նշենք, որ այն ներառում է 2017 թվականի նոյեմբերի 1-ից մինչեւ 2018 թվականի նոյեմբերի 1-ն ընկած ժամանակահատվածը:
Այս փաստատթղթերի ուսումնասիրությունից պարզ է դառնում, որ ՀՀԿ-ն եւ ԲՀԿ-ն պետբյուջեից միլիոնավոր դրամներ են ստացել:
ՀՀԿ-ն ստացել է 84, իսկ ԲՀԿ-ն 47 մլն դրամ:
Ստորեւ ներկայացնում ենք քաղաքական ուժերի ունեցվածքի հայտարարագրերը:
ՀՀԿ-ն հայտարարարագրել է 76 հատ անշարժ գույք: Սա ներառում է շենքեր-շինություններ, հողամասեր եւ ավտոկայանատեղիներ: Ըստ հայտարարագրի՝ ՀՀԿ կենտրոնական գրասենյակը, որը գտնվում է Մելիք Ադամյան 2 հասցեում, համարվում է ՀՀԿ-ի միանձնյա սեփականությունը: Այն զբաղեցնում է 1924 քմ տարածք: ՀՀԿ-ի մյուս 75 անշարժ գույքը բաշխված է ՀՀ ամբողջ տարածքով: Նախկին իշխող ուժն ունի նաեւ չորս ավտոմեքենա՝ Վազ 2121, «Նիսսան Պատֆայնդեր» եւ երկու «Նիսսան Սենտրա»:
ՀՀԿ-ի դրամական միջոցները կազմում են 256 մլն 961 հազար դրամ: Բացի այս կուսակցությունն ունի նաեւ այլ եկամտի միջոցներ, մասնավորապես, 222 մլն դրամ գոյացել է ՀՀԿ-ի անդամավճարներից, 1 մլն դրամ էլ վարձակալության վճարներից:
ՀՀԿ-ին մոտ 200 հազար վճարել է Վայոց Ձորի մարզպետարանը, 250 հազար Սոցապ ծառայությունը, 360 հազար Վեդի քաղաքում գտնվող Ֆրուտերիան եւ 200 հազար Վայքի աշխատանքի եւ զբաղվածության տարածքային կենտրոն ՊՈԱԿ-ը: Այսինքն՝ ստացվում է, որ ՀՀԿ-ն ժամանակին շինությունն է սեփականաշնորհել եւ հետո սկսել է վարձակալական հիմունքներով տալ պետությանը:
Շարունակելով ՀՀԿ-ի եկամտի աղբյուրների թվարկումը՝ նշենք, որ 84 մլն 400 հազար էլ պետական բյուջեն է ՀՀԿ-ին օրենքով սահմանաված կարգով ֆինասավորել, մոտ 38 մլն դրամ էլ ՀՀԿ-ն ձեռք է բերել գույքի օտարումից: Բացի թվարկածները կուսակցությունն ունի նաեւ 165 հազար դրամ, որը հայտարարագրված է որպես այլ եկամուտ:
«Քաղաքացու որոշում» սոցիալ-դեմոկրատական կուսակցութունը ոչինչ չի հայտարարագրել:
Դաշնակցությունը հայտարարագրել է 45 շենք ու շինություն՝ Երեւանում եւ ՀՀ մարզերում:
Ինչպես նաեւ 13 հողամաս՝ կրկին հանրապետության ամբողջ տարածքով: ՀՅԴ-ն ունի 6 մլն 6 հարյուր հազար դրամ դրամական միջոցներ: Եկամուտներն են՝ 41,5 մլն անդամավճարը, ֆինանսների նախարարությունից ստացած 11 մլն դրամը եւ 880 հազար դրամ՝ վարձակալությունից ստացված վճարից:
«Իմ քայլը» դաշինքի մաս կազմող «Քաղաքացիական պայմանագիր» կուսակցությունը որպես շենք-շինություն հայտարարագրել է ՔՊ-ի կենտրոնական գրասենյակը, որը վարձակալված է:
ՔՊ-ի դրամական միջոցները կազմում են 1 մլն 400 հազար ՀՀ դրամ: Իշխող քաղաքական ուժի եկամուտներն են՝ մոտ 5 մլն դրամ ֆիննախից ստացված եւ 2 մլն դրամ կուսակցության նվիրատվությունները: Դաշինքի մաս կազմող «Առաքելություն» կուսակցությունը հայտարարագրել է 45 հազար ՀՀ դրամ: Այն ստացել է որպես նվիրատվություն:
«Լուսավոր Հայաստան» կուսակցությունը որպես շենք-շինություն հայտարարագրել է կուսակցության վարձակալած գրասենյակը:
Դրամական միջոցները կազմում են 2 մլն դրամ: Եկամուտներն են՝ 10 մլն դրամ նվիրատվությունները եւ 4 մլն դրամ պետությունից տրված օրենքով սահմանված գումարը:
«Քրիստոնեա-Ժողովրդական վերածնունդ» կուսակցությունը որեւէ բան չի հայտարարագրել:
«Ազգային առաջընթաց» կուսակցությունը հայտարարագրել է 2 մլն դրամ գումար:
«Մենք» դաշինքի մաս կազմող «Ազատ դեմոկրատներ» կուսակցությունը հայտարարագրել է մեկ բնակարան, իսկ դաշինքի մյուս կուսակցությունը՝ «Հանրապետությունը», հայտարարագրել է 4 մլն դրամ, որը ստացել է ֆինանսների նախարարությունից:
«Օրինաց երկիր» կուսակցությունը հայտարարագրել է երկու ավտոմեքենա եւ մոտ 12 մլն դրամ, որը գոյացել է նվիրատվություններից:
«Սասնա ծռեր» կուսակցությունը որեւէ բան չի հայտարարագրել:
«Բարգավաճ Հայաստան» կուսակցությունը հայտարարագրել է 22 մլն դրամ:
Կուսակցության եկամտի աղբյուրներն են՝ ֆիննախից ստացած 47 մլն դրամը եւ նվիրատվություններից ստացած մոտ 39 մլն դրամը:
Հայկ Վարդանյան
