03.08.2026 | 14:50
Ձեր մարզիչը Մուլտի Վելնեսի տնօրե՞ն է նշանակվել. հարց` Վահագն Ալեքսանյանին. ՏԵՍԱՆՅՈՒԹ
Հայաստանը ՄԱԿ-ում աջակցություն է հայտնել UNDP-ի և UNFPA-ի մանդատներին
Քաղաքականություն
13.06.2026 | 12:34
ՄԱԿ-ում Հայաստանի մշտական ներկայացուցիչ Պարույր Հովհաննիսյանը մասնակցել է UNDP-ի, UNFPA-ի և UNOPS-ի Գործադիր խորհրդի տարեկան նստաշրջանին՝ վերահաստատելով Հայաստանի աջակցությունը կազմակերպությունների մանդատներին և ընդգծելով կայուն զարգացման, ժողովրդագրական քաղաքականության, կանանց հզորացման ու խոցելի խմբերի աջակցության ծրագրերի կարևորությունը։ Նա նաև շեշտել է, որ ՄԱԿ-ի բարեփոխումները պետք է բարձրացնեն արդյունավետությունը՝ առանց խաթարելու գործող ծրագրերի իրականացումը։
ՄԱԿ-ում Հայաստանի մշտական ներկայացուցիչ, դեսպան Պարույր Հովհաննիսյանը հունիսի 8-11-ը մասնակցել է ՄԱԿ-ի զարգացման ծրագրի (UNDP), ՄԱԿ-ի բնակչության հիմնադրամի (UNFPA) և ՄԱԿ-ի ծրագրերի իրականացման գրասենյակի (UNOPS) Գործադիր խորհրդի տարեկան նստաշրջանին։
Իր ելույթներում դեսպան Հովհաննիսյանը բարձր է գնահատել UNDP-ի և UNFPA-ի գործունեությունը՝ կայուն զարգացման, դիմակայունության, ժողովրդագրական քաղաքականության, կանանց և աղջիկների հզորացման, հումանիտար արձագանքի և խոցելի խմբերին աջակցության ուղղություններով։
Նա վերահաստատել է Հայաստանի աջակցությունը երկու կազմակերպությունների մանդատներին և ընդգծել կանխատեսելի ֆինանսավորման, ազգային մակարդակում արդյունավետ գործունեության և ծրագրային երկրների հետ շարունակական գործընկերության կարևորությունը։
UN80 նախաձեռնության շրջանակներում ընթացող քննարկումներին անդրադառնալով՝ դեսպան Հովհաննիսյանը շեշտել է, որ բարեփոխումները պետք է նպաստեն արդյունավետության և ազգային մակարդակում ազդեցության բարձրացմանը՝ միաժամանակ պահպանելով գործող մանդատները, մասնագիտական կարողություններն ու գործառնական գործունեությունը։
Նա ընդգծել է, որ ցանկացած անցումային գործընթաց պետք է բացառի ընթացիկ ծրագրերի իրականացման խաթարումը և ապահովի, որ ռեսուրսներն ու կառավարման կարողությունները շարունակեն ուղղված լինել արդյունքների ապահովմանը։
Դեսպան Հովհաննիսյանը վերահաստատել է Հայաստանի աջակցությունը անդամ պետությունների կողմից առաջնորդվող, թափանցիկ, ներառական և ապացույցների վրա հիմնված գործընթացին։
