Ռուսաստանը պատրաստ է նպաստել ԵՏՄ-ին Ադրբեջանի մերձեցմանը

Ռուսաստանը պատրաստ է օգնել Եվրասիական տնտեսական միությանն (ԵՏՄ) Ադրբեջանին մերձեցմանը և կցանկանար տեսնել երկիրը Եվրասիական զարգացման բանկի բաժնետերերի շարքում։ Այս մասին հայտարարել է Ռուսաստանի արտաքին գործերի փոխնախարար Միխայիլ Գալուզինը Պետերբուրգում տնտեսական համաժողովի շրջանակում։

«Մենք պատրաստ ենք անել ամեն ինչ, որպեսզի նպաստենք Ադրբեջանի մերձեցմանն այս ինտեգրացիոն միավորմանը (ԵՏՄ), քանի որ դա, մեր կարծիքով, կամրապնդի մեր ընդհանուր եվրասիական տարածքում առկա տնտեսական կապերը»,- ասել է փոխնախարարը։

Նա նաև կարծիք է հայտնել, որ դա «դրական ազդեցություն կունենա Ադրբեջանի տնտեսության վրա, քանի որ երկիրը հասանելիություն կստանա ընդհանուր ապրանքային շուկայի առավելություններին և կկարողանա ընդլայնել համագործակցությունը տրանսպորտի, ծառայությունների և ներդրումների ոլորտներում»։

«Մենք կցանկանայինք տեսնել Ադրբեջանին Եվրասիական զարգացման բանկի բաժնետեր և կարծում ենք, որ նման քայլը ճանապարհ կհարթի բանկի համար՝ հանրապետությունում խոշոր նախագծեր ֆինանսավորելու»,- նշել է Գալուզինը։

Հավելենք, որ Արցախյան 44-օրյա պատերազմից հետո Մոսկվան հատկապես ակտիվացրել է ջանքերը՝ ուղղված ԵՏՄ-ին Ադրբեջանի մերձեցմանը։ 2023, 2024 թվականներին Ադրբեջանի վարչապետ Ալի Ասադովը որպես հյուր մասնակցել է ՌԴ-ում ու Բելառուսում Եվրասիական միջկառավարական խորհրդի նիստերին։

Հիշեցնենք, որ ԵՏՄ անդամ երկրներն են՝ Հայաստանը, Բելառուսը, Ղազախստանը, Ղրղզստանը և ՌԴ-ն։

Թարգմանությունը՝ Էմմա Չոբանյանի