Հունիսին Ռուսաստանից Հայաստան թռիչքների թիվը ավելացել է, ուղղությունները՝ շատացել

Ռուսաստանից Հայաստան օրական թռիչքների մասին սոցցանցերում որոշ օգտատերեր գրում են, թե դրանք կտրուկ շատացել են, իսկ այլ օգտատերեր հերքում են դա։ Կան նաև այլ դեպքեր, երբ ներկայացնում են, որ Ռուսաստանից օրական 30 ինքնաթիռ է գալիս Հայաստան՝ հենց ընտրություններին մասնակցելու նպատակով  մարդկանց տեղափոխելու համար։

Այս պնդումների ճշմարտացիությունը ստուգելու համար Factor TV-ն ուսումնասիրել է վերջին օրերին Ռուսաստանից Հայաստան բոլոր քաղաքացիական թռիչքները։

Այսպիսով, 2026 թվականի հունիսի 1-3-ը Ռուսաստանից դեպի Հայաստան իրականացված թռիչքների քանակը կազմել է 107․ նախորդ տարվա նույն օրերին այդ թիվը 83 էր։ Մեկ տարվա ընթացքում արձանագրվել է 24 թռիչքով կամ մոտ 29%-ով աճ։

Factor TV-ն Ռուսաստանից Հայաստան թռիչքներն ուսումնասիրել է՝ Flightradar24-ի միջոցով դիտարկելով 2025-2026 թվականի նույն օրերի` հունիսի 1-3 ժամանակահատվածի բոլոր քաղաքացիական թռիչքները։

Այդ տվյալների համաձայն՝ այս տարվա հունիսի 1-ից 3-ն ընկած ժամանակահատվածում Ռուսաստանից Հայաստան իրականացվող չվերթների ուղղությունները զգալիորեն ընդլայնվել են։ 2025 թվականի նույն օրերին Ռուսաստանից Հայաստան չվերթներ եղել են 12 ուղղությունից, իսկ 2026 թվականի նույն ժամանակահատվածում դրանց թիվը հասել է 16-ի։ Այսինքն, այս տարի դեպի Հայաստան թռիչքներ են սկսվել նաև այնպիսի ռուսական քաղաքներից, որտեղից նախորդ տարի այդպիսի թռիչքներ չէին եղել։

Այս համատեքստում, սակայն, կարևոր է հիշել, որ նախորդ տարի որոշ սահմանափակումներ են գործել հենց ռուսական օդանավակայաններում։ Օրինակ, այս տարվա հունիսին դեպի Հայաստան թռիչքներ եղել են նաև Կրասնոդարից՝ 6 չվերթ։ Իսկ անցած տարի այս օդանավակայանից թռիչքները սահմանափակված են եղել ռուս-ուկրաինական պատերազմի պատճառով։ Այս օդանավակայանից թռիչքները վերսկսվել են 2025 թվականի սեպտեմբերից։

Հարկ է նաև նշել, որ Ռուսաստանի հայերի միության Կրասնոդարի տարածաշրջանային բաժանմունքը մայիսի 15-ին հայտարարություն էր տարածել՝ ընդգծելով, որ պատրաստ է աջակցել Կրասնոդարում բնակվող ՀՀ քաղաքացիների՝ Հայաստան մեկնելու կազմակերպմանը՝ ընտրություններին մասնակցելու համար։

Մոսկվայից չվերթներն ավելացել են

2026-ի հունիսի առաջին երեք օրերին Ռուսաստանից Հայաստան բոլոր չվերթների գրեթե կեսը՝ 107-ից 52-ը, իրականացվել է Մոսկվայից։ Նույնպիսի համամասնություն է եղել նաև նախորդ տարվա նույն օրերին։ Factor TV-ի ուսումնասիրած տվյալների համաձայն՝ ամենամեծ աճը նույնպես գրանցվել է հենց Մոսկվայի ուղղությամբ՝ +9 չվերթ։

2025-ի հունիսի 1-3-ին Մոսկվայից Հայաստան իրականացվել էր 43 չվերթ, իսկ 2026-ի նույն օրերին՝ 52 չվերթ։

Սա ցույց է տալիս, որ ուղղությունների ավելացման արդյունքում Մոսկվայից դեպի Հայաստան եկող թռիչքների քանակի նվազում չի եղել։ Հակառակը՝ ընդհանուր աճի պայմաններում ավելացել են թե՛ ուղղությունները, թե՛ Մոսկվայի ուղղությամբ իրականացվող չվերթները։

Ո՞ր ուղղություններով են չվերթներն ավելացել և նվազել

Երկրորդ խոշոր աճը Կրասնոդարի ուղղությամբ է, որտեղից, ինչպես նշեցինք, նախորդ տարի թռիչքներ չեն եղել։ Արդեն այս տարվա հունիսի 1-3-ն այս օդանավակայանից Հայաստան է եղել 6 չվերթ։

Աճել են նաև Սանկտ Պետերբուրգից չվերթները՝ 6-ից դառնալով 10։ Սարատովից չվերթների թիվը 0-ից դարձել է 2, իսկ Պերմից ու Սուրգութից՝ 1: Աճ է գրանցվել նաև Եկատերինբուրգի, Սամարայի, Ուֆայի, Նիժնի Նովգորոդի ուղղություններով։

Միաժամանակ նվազել են Սոչիից և Միներալնիե Վոդիից Հայաստան իրականացված չվերթները։ Սոչիից չվերթների թիվը 2025-ի հունիսի 1-3-ի՝ 13 չվերթից 2026-ին դարձել է 11։ Միներալնիե Վոդիից չվերթները նվազել են 1-ով։

Կան նաև ուղղություններ, որտեղ ընդհանուր թիվը չի փոխվել։ Նովոսիբիրսկից երկու տարիներին էլ եղել է 2 չվերթ, Կազանից՝ 1, Չելյաբինսկից՝ 1, Տյումենից՝ 1։

Այսպիսով, ՀՀ Ազգային ժողովի ընտրություններից առաջ, նախորդ տարվա հունիսի 1-ից 3-ն ընկած ժամանակահատվածի համեմատ, ՌԴ-ից դեպի Հայաստան թռիչքների թիվն աճել է 29%-ով։

Միաժամանակ, 2026 թ․ ՌԴ-ից Հայաստան եկող ուղղությունների ընդլայնմանը զուգահեռ, Մոսկվայից թռիչքների թիվն ավելացել է 9-ով, իսկ Սանկտ Պետերբուրգից՝ 4-ով։

Այսինքն, թեև Ռուսաստանից Հայաստան օրական մոտ 30 թռիչքի իրականացումը նոր չէ, սակայն նախորդ տարվա նույն օրերի համեմատ կա նաև թռիչքների էական լրացուցիչ ակտիվացում․ առնվազն հունիսի 1-3-ը թռիչքներն ավելացել են մոտ 30 տոկոսով։

Մարիա Խաչատրյան