Թրամփը հայտարարել է, որ Իրանի հետ համաձայնագիրը կարող է ձեռք բերվել «հաջորդ շաբաթվա ընթացքում»

ԱՄՆ նախագահ Դոնալդ Թրամփը ABC News-ին տված հարցազրույցում կարծիք է հայտնել, որ Հորմուզի նեղուցը վերաբացնելու և Իրանի հետ հրադադարի ռեժիմը երկարաձգելու շուրջ համաձայնագիրը հնարավոր է «հաջորդ շաբաթվա ընթացքում», գրում է CNN-ը։

Չնայած նա ակնարկել է, որ դիվանագիտությունը դեռևս սեղանին է, Թրամփն ասել է, որ «դեռ պետք է մի քանի կետի շուրջ պայմանավորվի»՝ համաձայնագիրը ստորագրելու համար։

ABC-ի լրագրող Ջոնաթան Քարլի հետ հեռախոսազրույցի ժամանակ Թրամփը նաև նշել է, որ հնարավոր խաղաղության համաձայնագիրը կարող է գերազանցել ռազմական հաղթանակը, սակայն ընդունել է, որ «դա պարզ բան չէ»։

«Բայց մենք ստանում ենք այն, ինչ մեզ անհրաժեշտ է»,- հավելել է Թրամփը։

Հարավային Լիբանանում Իսրայելի գործողություններին անդրադառնալով՝ Թրամփն ասել է. «Այսօր մի փոքր սխալ կար, բայց ես այն շատ արագ շտկեցի, ինչպես դուք, հավանաբար, նկատեցիք»։

Ավելի վաղ Թրամփը հայտարարել էր, որ կանխել է Իսրայելի վարչապետ Բենիամին Նեթանյահուի կողմից «Բեյրութի, Լիբանանի վրա խոշոր հարձակումը»։

Ավելի վաղ Լիբանանում Իսրայելի կողմից սահմանված թիրախներին հասցված հարվածների ֆոնին՝ իրանական Tasnim լրատվական գործակալությունը հայտարարել էր Վաշինգտոնի հետ միջնորդավորված բանակցությունների դադարեցման մասին: Իրանի իշխանությունները կարծում են, որ Լիբանանի հարցն ԱՄՆ-ի հետ հրադադարի համաձայնության պայմաններից մեկն է, սակայն այնտեղ մարտերը շարունակվում են «բոլոր ճակատներում»:

Թրամփը հերքել էր բանակցությունների դադարեցման մասին պնդումները և ընդգծել, որ դրանք «շարունակվում են արագ տեմպերով»։ TruthSocial սոցցանցում արված գրառման մեջ ԱՄՆ նախագահը նշել էր, որ համաձայնության է եկել Իսրայելի և Լիբանանի հետ փոխադարձ հարձակումները դադարեցնելու վերաբերյալ՝ այդպիսով ապահովելով բանակցությունների շարունակությունը։

Թարգմանությունը՝ Էմմա Չոբանյանի