Ես ընդամենը զարմանք եմ արտահայտել փաստի մասին. Իոաննիսյանն անդրադարձավ իր դեմ ԼՀԿ բողոքին. ՏԵՍԱՆՅՈՒԹ

Կենտրոնական ընտրական հանձնաժողովի նիստում քննարկվել է «Անկախ դիտորդ» դաշինքի կազմում ընդգրկված «Իրազեկ քաղաքացիների միավորում» հասարակական կազմակերպությանը դիտորդական հավատարմագրումից զրկելու վերաբերյալ հարցը։

Ըստ կուսակցության և ընտրական ցուցակը գլխավորող Էդմոն Մարուքյանի՝ Իոաննիսյանը, հիմնվելով «սունկ» կայքերից մեկի հրապարակման վրա, թիրախավորել և փաստացի հակաքարոզչություն է իրականացրել Մարուքյանի դեմ, ինչը դիտել է ավելի քան 100 հազար օգտատեր։

«Լուսավոր Հայաստան»-ը պնդում է, որ դիտորդական առաքելություն իրականացնող սուբյեկտը դրանով կոպտորեն խախտել է Ընտրական օրենսգրքով սահմանված վարքագծի կանոնները՝ չպահպանելով քաղաքական չեզոքության և քարոզչություն կամ հակաքարոզչություն չիրականացնելու իմպերատիվ պահանջը:

Իր ելույթում Իոաննիսյանը հայտարարել է, որ ինքն ընդամենը զարմանք է արտահայտել, ինչը չի կարող դիտարկվել որպես քարոզչություն կամ հակաքարոզչություն։

«Իմ կողմից միակ հրապարակված փաստը իմ զարմանքն է: Ես արտահայտել եմ իմ զարմանքը տեղի ունեցած փաստի վերաբերյալ. ինչ-որ կայք հրապարակել էր, որ Էդմոն Մարուքյանը հասարակական կարծիքի առաջնորդ է։ Ես չեմ ասել, որ դա լավ է, կամ դա վատ է։ Ընդամենը արտահայտել եմ բառացի, տառացի իմ զարմանքը։ Քարոզչության և հակաքարոզչության արանքում կա չեզոքություն, և նման զարմանքի արտահայտումը գտնվում է չեզոք հատվածում»,- նշեց նա։

Անդրադառնալով պահանջին կամ հորդորին, թե ինքը պետք է հերքում հրապարակի, Իոաննիսյանն արձագանքեց. «Ինձ առաջարկել են հերքել… Ի՞նչը հերքեմ, իմ զարմա՞նքը: Հերքեմ, ասեմ՝ կներե՛ք, ես զարմանք չե՞մ ապրում։ Դա ֆիզիկապես ո՞նց է հնարավոր»։

Նիստի ընթացքում ԿԸՀ նախագահ Վահագն Հովակիմյանի այն հարցին, թե որպես դիտորդ արդյոք ընդունում է, որ իր խոսքի ազատությունը պետք է սահմանափակվի, Իոաննիսյանը հիշեցրեց օրենքի պահանջը.«Դա Ընտրական օրենսգրքում գրված է, իմ ընդունել-չընդունելու հարցը չկա։ Որպես դիտորդ հավատարմագրվելուց հետո իմ հրապարակային խոսքն էապես փոխվել է»։

Մանրամասները՝ տեսանյութում։